સમજાવટના પ્રયાસ આંશિક સફળ, બે બાગીએ ફોર્મ પરત ખેંચ્યાં : ટિકિટ ફાળવણીમાં મનમાનીથી રોષ : અનેક વોર્ડમાં ક્રોસ વોટિંગ થવાની સંભાવનાઃ મોરબી તા.પં.ની જાંબુડિયા બેઠક બિનહરીફ
મોરબી, : મહાપાલિકા તરીકેની પ્રથમ ચૂંટણીમાં મોરબી ભાજપે વિપક્ષો ઉપરાંત બળવાખોરીનો પણ સામનો કરવો પડી રહ્યો છે. અલગ-અલગ વોર્ડમાં કુલ 18 બગાવતીઓએ અપક્ષપણે ઝૂકાવ્યા બાદ આગેવાનોએ સમજાવટના પ્રયાસ કર્યા છતાં એમાંનાં 16 બાગીઓએ ફોર્મ પરત ખેંચ્યા ન હોવાથી ચૂંટણીજંગની રસાકસી વધી જવા પામી છે.
અગાઉ ભાજપની ચૂંટણી સમિતિના વડા એવા ભૂતપૂર્વ મંત્રીએ મોરબી પહોંચી સમાધાનના પ્રયાસ કરાવ્યા હતા, જે પછી આજે ફોર્મ પાછાં ખેંચવાના અંતિમ દિવસે વોર્ડ નં. 6માં પૂર્વ કાઉન્સિલર અનોપસિંહ જાડેજા તથા વોર્ડ નં. 10માં હર્ષદ કણઝારિયા અપક્ષપણે ચૂંટણી લડવામાંથી ખસી ગયા છે. જો કે, વોર્ડ નં. 7માં અનોપસિંહનાં પત્ની સીતાબા જાડેજા અપક્ષ ઉમેદવાર તરીકે યથાવત્ રહ્યા છે. ત્યાં પોતાના સમર્થક મતદારોમાં ક્રોસ વોટિંગ થવાની સંભાવનાને લઈને ભાજપ આગેવાનો ચિંતિત છે. એ જ રીતે, વોર્ડ નં. 1, 5, 7, 8 અને 9માં પણ ભૂતપૂર્વ નગરસેવકથી માંડીને મહિલા મોરચા અગ્રણી તથા માજી નગરપતિ સહિતના બાગીઓએ ફોર્મ પાછાં નહીં ખેંચતાં ઠેરઠેર ક્રોસ વોટિંગ થઈ શકે છે.
વિશ્વસ્ત સૂત્રો કહે છે કે ક્યાંક ગુનાઈત પ્રવૃત્તિ સાથે સંકળાયેલા વ્યક્તિને ટિકિટ આપી દેવાથી માંડીને ભાજપ સંગઠન અગ્રણીના ડ્રાયવરને પણ સાચવી લેવાયાનો કકળાટ ભાજપમાં ફૂંફાડા મારી રહ્યો છે. આ મામલે માજી સાંસદ, ધારાસભ્ય અને જિલ્લા ભાજપ આગેવાનની મનમાની તરફ અંગુલીનિર્દેશ થઈ રહ્યો છે. જે જ્ઞાાતિના હજારેક મતદારો પણ નથી તે જ્ઞાાતિને ચાર વોર્ડમાં પ્રતિનિધિત્વ, ભાજપના સંનિષ્ઠ કાર્યકરને કાપીને નવાસવાને પ્રાધાન્ય, વોર્ડ નં. 12માં સતવારા સમાજ અને પાટીદાર સમાજને પૂરતો ન્યાય ન અપાયો વગેરે મુદ્દે નારાજ કાર્યકરો- આગેવાનો પ્રચારમાં નિષ્ક્રિય રહે એવા નિર્દેશ મળે છે. બીજીતરફ, કોંગ્રેસમાંથી વોર્ડ નં. 4ના એક મહિલા ઉમેદવારે આજે ફોર્મ પરત ખેંચી લેતાં ત્યાં કોંગ્રેસની પેનલ તૂટી છે, તો મોરબી તાલુકા પંચાયતની જાંબુડિયા બેઠક પણ ભાજપને બિનહરીફ મળી ગઈ છે.
