Vadodara Corporation Elections : વડોદરા મ્યુનિસિપલ કોર્પોરેશનની આગામી ચૂંટણીને લઈ શહેરમાં રાજકીય ગરમાવો વધી રહ્યો છે. તમામ રાજકીય પક્ષોએ પ્રચારનો જોર-શોર વધારી દીધો છે. ઢોલ-નગારાં અને માઈકના ગુંજારવ સાથે ચૂંટણીનો માહોલ રંગત પકડી રહ્યો છે.
ઉમેદવારો મતદારોને રીઝવવા ગલી-ગલી ફરી રહ્યા છે અને સુવિધા, વિકાસ તથા વિસ્તારની સમસ્યાઓના નિવારણના વચનો આપી રહ્યા છે. જોકે, ચૂંટણી સમયે જ નતમસ્તક થઈ દ્વારે આવતા ઉમેદવારો સામે અનેક સ્થળોએ મતદારોએ આક્રોશ ઠાલવ્યો હોવાના બનાવો પણ સામે આવ્યા છે.
તો બીજી તરફ, શામ-દામ-દંડ-ભેદની નીતિ અંતર્ગત વિરોધી જૂથો વચ્ચે ઝઘડા અને મારામારીની ઘટનાઓ પણ નોંધાઈ છે. ચૂંટણી પ્રચારની ફેરણીમાં ઉમેદવારો ભીડ ભેગી કરવા હાંફી રહ્યા છે. એવી ચર્ચા જોર પકડી રહી છે કે ફેરણીમાં ભીડ દેખાડી “સોટા પાડવા” માટે માથાદીઠ રૂ. 200ની લ્હાણી કરવામાં આવી રહી છે.
ટૂંકમાં, ચૂંટણીના રણસંગ્રામ વચ્ચે વડોદરામાં રાજકીય ઉત્તેજના અને ચર્ચાઓ ચરમ સીમાએ છે. હવે જોવાનું એ રહ્યું કે મતદારો કોના વચનો અને કામ પર ભરોસો મૂકે છે.
