Gujarat Heatwave Alert: છેલ્લાં બે ત્રણ દિવસથી આકાશમાંથી જાણે અગનગોળા વરસી રહ્યાં હોય તેવું લોકો અનુભવી રહ્યાં છે. ગુજરાત કાળઝાળ ગરમીમાં શેકાયું છે પરિણામે લોકોએ ઘરની બહાર નીકળવાનું પણ ટાળ્યું છે. શહેરોમાં વાહનોથી ધમધમતા માર્ગો પર સૂનસાન બન્યાં હતાં. ભરબપોરે જનતા કરફ્યુ જેવો માહોલ જોવા મળી રહ્યો છે.
શહેરોમાં બપોરે જનતા કરફ્યુ જેવો માહોલ
આ સ્થિતિમાં જો હિટસ્ટ્રોકના દર્દીઓને તાકીદે સારવાર મળી રહે તે હેતુસર રાજ્ય આરોગ્ય વિભાગે તમામ જિલ્લા અને સબ ડિસ્ટ્રીક્ટ હોસ્પિટલમાં હિટ મેનેજમેન્ટ રૂમ ઊભા કર્યા છે. આ ઉપરાંત હિટવેવની સ્થિતિમાં શું કરવું તે અંગે રાજ્ય આરોગ્ય વિભાગે ખાસ એડવાઈઝરી પણ જાહેર કરી છે. હવામાન ખાતાએ વ્યક્ત કરેલી સંભાવના મુજબ, આગામી 48 કલાકમાં ઉષ્ણતામાન આંકમાં બેથી ત્રણ ડિગ્રીનો વધારો નોંધાશે.
રાજકીય ગરમાવો વધ્યો, પણ આકરી ગરમીએ જનતાને બેહાલ કરી
એક તરફ, મહાનગરપાલિકા, જિલ્લા-તાલુકા પંચાયતની ચૂંટણીને આડે ગણતરીના દિવસો બાકી રહ્યાં છે ત્યારે બીજી તરફ, રાજ્યમાં કાળઝાળ ગરમીમાં ત્રાહિમામ પોકારી ઉઠ્યાં છે. વધતી ગરમીને લીધે લોકો બપોરે ઘરમાં જ પુરાઈ રહ્યાં હતાં. ગરમીથી બચવા લોકોએ શેરડીના રસથી માંડીને જ્યુસ સહિતના ઠંડાપીણાનો સહારો લેવો પડ્યો હતો. બે ત્રણ દિવસથી અતિશય ગરમીને લીધે લૂ લાગવાના કેસો પણ વધ્યાં છે.
હિટવેવની સ્થિતિમાં શું કરવું ?
– હિટવેવ હોય તો બપોરે 1થી 4 દરમિયાન કામ વગર ઘરની બહાર નીકળવાનું ટાળવું.
– કામથી બહાર નીકળવાનું થાય ત્યારે માથા ઉપર ટોપી અથવા ભીનું કપડું રાખવું.
– હળવા રંગના અને સુતરાઉ કપડાં પહેરવા
– વડીલો, બાળકો અને સગર્ભાઓની વિશેષ કાળજી લેવી
– વધુ પ્રમાણમાં પાણી, છાસ, લીંબુ શરબત, નાળિયેર પાણીનું સેવન કરવું
– જો ચક્કર આવવા, તરસ લાગવી, માથાનો દુખાવો, બેભાન થવું, આવા લક્ષણો દેખાય, તો આરોગ્ય કેન્દ્રનો સંપર્ક કરવો.
– સરકારી હોસ્પિટલો, સામૂહિક આરોગ્ય કેન્દ્રોમાં પૂરતી માત્રામાં ORS, દવા અને આઈસ-પેક પૂરતાં પ્રમાણમાં રાખવાની સૂચના
48 કલાકમાં ગરમી બે-ત્રણ ડિગ્રી વધશે..ક્યાં સૌથી વધુ તાપમાન?
આ પણ વાંચો: સેવાનું સ્વપ્ન કે મેવાનો મોહ? માત્ર 15 હજાર પગાર છતાં કાઉન્સિલર બનવા કરોડપતિ અને MBA ઉમેદવારોની કતાર
હિટસ્ટ્રોક રોકવા NCDCની ગાઈડલાઈન લાગુ કરવા આદેશ
હિટવેવની સ્થિતિને જોતાં હિટસ્ટ્રોકના કેસો વધે નહીં તે માટે આરોગ્ય વિભાગે નેશનલ સેન્ટર ફોર ડિસીઝ કંટ્રોલની માર્ગદર્શિકાનું ચુસ્ત પાલન કરવા બધા જિલ્લા આરોગ્ય કેન્દ્રોને સૂચના આપી છે. આ ઉપરાંત ઇન્ટિગ્રેટેડ હેલ્થ ઇન્ફોર્મેશન પ્લેટફોર્મ થકી હિટસ્ટ્રોકના કેસોનું સઘન દૈનિક મોનિટરિંગ કરવામાં આવી રહ્યું છે. હિટસ્ટ્રોકને લઈને આરોગ્ય કર્મીઓને વિશેષ તાલીમ આપવામાં આવી છે જેથી દર્દીઓને ત્વરિત સારવાર મળી રહે.
ગરમીના પ્રકોપ સામે લડવા આરોગ્ય વિભાગ સજ્જ
હજુ બે-ચાર દિવસ સુધી હિટવેવની સ્થિતિ યથાવત રહેશે તેવી આગાહીને જોતાં આરોગ્ય વિભાગે જિલ્લાઓમાં ‘હીટ-હેલ્થ એક્શન પ્લાન’ કાર્યરત કર્યો છે. બધીય સરકારી હોસ્પિટલોમાં પૂરતી માત્રામાં દવાઓ, ઓઆરએસ અને આઈસ પેકનો સ્ટોક સુનિશ્ચિત કરવા સૂચના અપાઈ છે. આ ઉપરાંત દરેક જિલ્લા અને સબ-ડિસ્ટ્રિક્ટ હોસ્પિટલમાં પાંચ અને સામુહિક આરોગ્ય કેન્દ્રમાં બે બેડના સમર્પિત ‘હીટ સ્ટ્રોક મેનેજમેન્ટ રૂમ’ની સુવિધા પણ ઊભી કરાઈ છે.
