Ahmedabad Fake Ghee Racket Busted: ગુજરાતમાં ઘણી જગ્યાએ ઘીનો નકલી જથ્થો ઝડપાતો હોવાની ઘટના સામે આવતી હોય છે, ત્યારે અમદાવાદ મ્યુનિસિપલ કોર્પોરેશન(AMC)ના હેલ્થ અને ફૂડ વિભાગ દ્વારા નિકોલમાંથી નકલી ઘી બનાવવાના કૌભાંડનો પર્દાફાશ કરવામાં આવ્યો છે. સમગ્ર મામલે AMCના ફૂડ વિભાગે 400 કિલો જેટલો જથ્થો જપ્ત કરીને આગળની કાર્યવાહી હાથ ધરી છે.
અમદાવાદના નિકોલમાં નકલી ઘી બનાવવાનું કૌભાંડ ઝડપાયું
બાતમીના આધારે AMCના ફૂડ ડિપાર્ટમેન્ટે નિકોલમાં રેડ પાડીને એક મકાનમાં ચાલતા નકલી ઘી બનાવવાના એક મોટા કૌભાંડનો પર્દાફાશ કર્યો છે. આ રેડ દરમિયાન FSSAIના લાયસન્સ કે રજિસ્ટ્રેશન વિના ભેળસેળવાળું ઘી બનાવીને બજારમાં વેચવામાં આવતું હતું. આરોગ્ય વિભાગે તૈયાર નકલી ઘીનો જથ્થો અને સાધન-સામગ્રી સીઝ કરીને કાર્યવાહી હાથ ધરી છે.
આરોપી પોતાના કમાનમાં ડુપ્લીકેટ ગાયનું ઘી બનાવતો
મળતી માહિતી મુજબ, રામગોપાલ રાણારામજી કુંપાવત નામનો શખસ નિકોલમાં પોતાના મકાનના પહેલા માળે આ ધંધો ચલાવતો હતો. તે વેજીટેબલ ફેટ અને પામોલીન તેલ મિક્ષ કરીને ડુપ્લીકેટ ગાયનું ઘી બનાવતો હતો અને તેને Cow Ghee(Mangalmurti) બ્રાન્ડના નામે પેક કરીને બજારમાં વેપાર કરતો હતો.
કસ્ટમરોને છેતરવા માટે તે જારના લેબલ પર ઉત્પાદક તરીકે મુરલીધર ફૂડ પ્રોડક્ટ્સ, કઠવાડાનું નામ અને એક્સપાયર થઈ ગયેલો FSSAI લાયસન્સ નંબર લખતો હતો.
આ પણ વાંચો: અમદાવાદ: નિકોલમાં હોન્ડાના ગોડાઉનમાંથી 31 એક્ટિવા ચોરીનો ભેદ ઉકેલાયો, પોલીસે આરોપીઓને ઝડપી પાડ્યા
મહત્ત્વનું છે કે, ફૂડ વિભાગે ઘટના સ્થળેથી 1,60,000ની કિંમતનો 400 કિલો જેટલો 500 ગ્રામ અને 100 mlના પેક જારનો જથ્થો જપ્ત કર્યો છે. આ ઉપરાંત, 500 કિલો જેટલાં ખાલી જાર, લેબલો તેમજ ઘી બનાવવા અને પેકિંગ કરવાના સાધનો ગેસ, તપેલા, બાટલા, ટબ વગેરે સીઝ કર્યા છે. હાલમાં આ નકલી ઘીના નમૂના લઈને લેબોરેટરીમાં તપાસ અર્થે મોકલી આપવામાં આવ્યા છે.
