મુંબઈ : મુંબઈ ઝવેરીબજારમાં આજે સોના- ચાંદીના ભાવમાં ઝડપી ઘટાડો આગળ વધ્યો હતો. નવી માગ ધીમી હતી. વિશ્વબજાર તૂટતાં ઘરઆંગણે ઈમ્પોર્ટ કોસ્ટ નીચી ઉતરતાં ઝવેરીબજારમાં ભાવ દબાણ હેઠળ જોવા મળ્યા હતા. હવે લગ્નસરાની માંગ પર બજારની નજર હતી. દરમિયાન, વિશ્વ બજારમાં સોનાના ભાવ ઔંશના ૪૭૫૧ વાળા ઘટી નીચામાં ભાવ ૪૬૮૪ થઈ ૪૭૩૯થી ૪૭૪૦ ડોલર રહ્યા હતા.
ઘરઆંગણે અમદાવાદ ઝવેરીબજારમાં આજે સોનાના ભાવ ૧૦ ગ્રામના રૂ.૧૫૦૦ તૂટયા હતા. જ્યારે અમદાવાદ ચાંદીના ભાવ કિલોના રૂ.૧૦ હજાર ગબડયા હતા. વિશ્વબજારમાં સોના પાછળ ચાંદીના ભાવ ઔંશના ૭૬.૭૩ ડોલર રહ્યા હતા. અમદાવાદ બજારમાં સોનાના ભાવ ઘટી ૯૯૫ના રૂ.૧૫૫૨૦૦ તથા ૯૯૯ના રૂ.૧૫૫૫૦૦ રહ્યા હતા જ્યારે અમદાવાદ ચાંદીના ભાવ ગબડી રૂ.૨૪૦૦૦૦ બોલાયા હતા.
દરમિયાન, વિશ્વબજારમાં ક્રૂડતેલના ભાવ ઉછળ્યા પછી તૂટયા હતા. બ્રેન્ટક્રૂડના ભાવ બેરલના ઉંચામાં ૧૦૬.૧૫ ડોલર થયા પછી નીચામાં ભાવ ૧૦૧.૨૫ થઈ ૧૦૧.૫૮ ડોલર રહ્યા હતા. યુએસ ક્રૂડના ભાવ ઉંચામાં ૯૪.૪૫ તથા નીચામાં ભાવ ૮૭.૭૬ થઈ ૯૨.૭૦ ડોલર રહ્યા હતા.
ચીન હવે પોતે ક્રુડ રિફાઈન્ડ કરવાના બદલે પોતાના પાસે પડેલું ક્રુડ વિશ્વબજારમાં વેંચવા નિકળ્યાના સમાચાર મળ્યા હતાદેશમાં છેલ્લા સતત ૧૧ મહિનાથી ક્રૂડનું ઉત્પાદન ઘટતું રહ્યું છે. ૧૧ વર્ષમાં ઉત્પાદનમાં ૨૨ ટકા ઘટયું છે. આના પગલે આયાત પર આધાર ૮૯ ટકાએ પહોંચ્યો છે.
મુંબઈ બુલીયન બજારમાં આજે સોનાના ભાવ રૂ.૧૦૦૦ તૂટયા હતા જ્યારે ચાંદીના ભાવ રૂ.૮૦૦૦ ગબડયા હતા. મુંબઈ સોનાના ભાવ ઘટી જીએસટી વગર ૯૯૫ના રૂ.૧૫૦૪૫૪ તથા ૯૯૯ના રૂ.૧૫૧૦૫૯ રહ્યા હતા જ્યારે મુંબઈ ચાંદીના ભાવ ઘટી જીએસટી વગર રૂ.૨૪૦૫૯૬ રહ્યા હતા.
