ઝડપી લેવાયેલો મૂળ ભાવનગરનો કેવલ તેજાણી સોશિયલ મીડિયાની રીલ્સ ઉપરથી હોટલ માલિકના નંબર મેળવી ફોન કરી ઠગાઈ કરતો હતો
સુરત, : ગેસ સિલિન્ડરની અછત વચ્ચે સોશિયલ મિડીયાની રીલ્સ ઉપરથી હોટલ માલિકના નંબર મેળવી ફોન કરી સસ્તામાં ગેસ સિલિન્ડર ઓનલાઇન બુક કરવાનું કહી સરથાણાના ભજીયાના વેપારી સહિત ત્રણ પાસે રૂ. 33,400 પડાવી ઠગાઈ કરનાર ભેજાબાજને સરથાણા પોલીસે ઝડપી લીધો છે. ઈરાન અને અમેરિકા વચ્ચેના યુદ્ધને પગલે સર્જાયેલી સ્થિતીમાં કોમર્શીયલ ગેસની અછત વચ્ચે હોટલ માલિકો અને નાસ્તાની લારી ધરાવતા લોકોને એક વ્યક્તિએ ફોન કરી સસ્તામાં ગેસ સિલિન્ડર અપાવવાની વાત કરતા હોટલ માલિકો અને નાસ્તાની લારી ધરાવતા લોકોએ તેની વાત ઉપર વિશ્વાસ મૂકી તેણે વ્હોટ્સએપ ઉપર મોકલેલા ક્યુઆર કોડ ઉપર પેમેન્ટ કર્યું હતું.જોકે, પેમેન્ટ કર્યા બાદ તે વ્યક્તિએ ગેસ સિલિન્ડર મોકલ્યા નહોતા.આ રીતે તે વ્યક્તિએ ભજીયાના વેપારી વિજયભાઇ જયંતીભાઇ સોરઠીયા (રહે.C/1/506, વ્રજવીહાર રેસિડન્સી, વ્રજચોક, સુરત. મૂળ રહે.માણેકવાડા, તા.કોટડા સાંગાણી, જી.રાજકોટ) સહિત ત્રણ પાસે કુલ રૂ.33,400 પડાવ્યા હતા.વિજયભાઈએ આ અંગે ગત રોજ સરથાણા પોલીસ મથકમાં ફરિયાદ નોંધાવી હતી. દરમિયાન, સરથાણા પોલીસ મથકના સર્વેલન્સ સ્ટાફના પીએસઆઇ એસ.ડી.ચૌધરી અને સ્ટાફે હોટલ માલિકો સાથે ગેસ સિલિન્ડરના નામે ઠગાઈ કરતા ભેજાબાજ કેવલ માવજીભાઇ તેજાણી (ઉ.વ. 35, રહે.ઘર નં.B/56, રાધાક્રિષ્ના સોસાયટી, ખોડીયારનગર રોડ, વરાછા, સુરત. મૂળ રહે.રાણીવાડ ગામ, તા.ગારીયાધાર, જી.ભાવનગર) ને ઝડપી પાડી પુછપરછ કરતા તેણે કબૂલાત કરી હતી કે તે સોશિયલ મિડીયામાં આવતી હોટેલ, રેસ્ટોરન્ટ, ખાણી પીણીની દુકાનોની રીલ્સ જોઈ તેમાં દેખાતા દુકાનોના બોર્ડ-બેનરમાંથી માલિકનો નંબર મેળવી તેમને સસ્તા ભાવે ગેસ સિલિન્ડર આપવાનું કહી સ્કેનર મોકલી પૈસા ટ્રાન્સફર કરાવી ઠગાઈ કરતો હતો. કેવલ ગાઉ હીરાદલાલ તરીકે કામ કરતો હતો ત્યારે હીરા ખરીદવાના બહાને અને મોપેડ ખરીદવાના બહાને તેણે ઠગાઈ કરતા જેલની હવા ખાધી હતી.
