વડોદરાઃ વડોદરા શહેરની હદમાં કોર્પોરેશન ઉપરાંત જિલ્લા પંચાયત અને તાલુકા પંચાયતની કેટલીક બેઠકો માટે તા.૨૬મીએ મતદાન થનાર હોવાથી શહેર પોલીસ કમિશનરે આજે પોલીસ બંદોબસ્તને આખરી ઓપ આપ્યો હતો,જે મુજબ શહેરમાં અર્ધ લશ્કરી દળો સહિત ૫૦૦૦ જેટલી પોલીસ આવતીકાલે તૈનાત કરી દેવામાં આવશે.
વડોદરા કોર્પોરેશનની ૧૯ વોર્ડની ૭૬ બેઠક ઉપરાંત વડોદરા શહેરની હદમાં આવતા ગ્રામ્ય વિસ્તારોમાં જિલ્લા પંચાયતની ૭ અને તાલુકા પંચાયતની ૧૩ બેઠકો માટે શહેર પોલીસે બંદોબસ્ત ગોઠવી દેવા તૈયારી કરી છે.
શહેર પોલીસ કમિશનરે કહ્યું છે કે, ચૂંટણી દરમિયાન આચારસંહિતાનું પાલન થાય તેમજ કોઇ પણ અનિચ્છનિય બનાવ ન બને તે માટે અટકાયતી પગલાંના ભાગરૃપે ૪૦૨૪ જણાની સામે કાર્યવાહી કરવામાં આવી છે.મતદાનના દિવસે શહેર પોલીસની સાથે સીઆરપીએફની એક કંપની,એસઆરપીની કંપની,૯ ડીસીપી,૧૩ એસીપી સહિત ૫૦૦૦ જેટલા પોલીસ કર્મીઓ બંદોબસ્ત જાળવશે.
શહેર પોલીસ દ્વારા સંવેદનશિલ વિસ્તારોમાં સતત પેટ્રોલિંગ કરવામાં આવી રહ્યું છે અને ડ્રોન સર્વેલન્સ પણ કરવામાં આવી રહ્યું છે.મતદાન મથકોની આસપાસ તેમજ અંદર પણ પોલીસ મૂકી દેવામાં આવી છે.જ્યારે,ઇવીએમ લાવવા-લઇ જવા અને સ્ટ્રોંગરૃમ ફરતે અભેદ સુરક્ષા કવચ ગોઠવી દેવામાં આવ્યું છે.
મતદાન મથકો પર અશક્ત,વિકલાંગ અને વૃધ્ધોને મદદ કરવા પોલીસને સૂચના
લોકશાહીના પર્વ દરમિયાન કોઇ પણ મતદારને અડચણ ના પડે તે માટે પોલીસ પણ મદદરૃપ થશે.
પોલીસ કમિશનરે ચૂંટણીના બંદોબસ્તમાં હાજર રહેનાર તમામ પોલીસ કર્મીઓને મતદાન માટે આવતા અશક્ત,વૃધ્ધ તેમજ વિકલાંગને મદદરૃપ થવા સૂચના આપવામાં આવી છે.
મતદાન મથકો પર મહિલા પોલીસ પણ હાજર રહેનાર છે અને તેમને પણ મહિલાઓને મદદરૃપ થવા માટે સૂચના આપવામાં આવી છે.
ચૂંટણી માટેનો પોલીસ બંદોબસ્ત
હોદ્દો સંખ્યા
જોઇન્ટ કમિશનર ૧
એડિ.કમિશનર ૧
ડીસીપી ૯
એસીપી ૧૩
પીઆઇ ૬૮
પીએસઆઇ ૧૬૯
તાલીમાર્થી ૨૪૬
એસઆરપી એક પ્લાટુન
સીઆઇએસએફ ૧ કંપની
પોલીસ જવાનો ૨૦૫૭
હોમગાર્ડ ૧૪૦૬
વિવિધ બ્રાન્ચો –
5000થી વધુ કેમેરા મારફતે પોલીસની નજર
મતદાન દરમિયાન કોઇ પણ અનિચ્છનિય બનાવ ના બને તે માટે પોલીસ દ્વારા કેમેરાનો પણ ઉપયોગ કરવામાં આવનાર છે.મતદાન મથકો ઉપરાંત,બોડીવોર્ન કેમેરા, શહેર પોલીસ તેમજ કોર્પોરેશનના કેમેરાઓ મળી ૫હજારથી વધુ સીસીટીવી મારફતે પોલીસની ટીમો સ્થિતિ પર નજર રાખશે.
