Ahmedabad Crime Branch Vatva Excavation: શહેરના વટવા વિસ્તારમાં આવેલા કુતુબ નગરમાં આજે ક્રાઈમ બ્રાન્ચના કાફલાએ ધામા નાખ્યા છે. 1992માં થયેલી એક યુવતીની કથિત હત્યાનો ભેદ ઉકેલવા માટે પોલીસે જેસીબી (JCB) મશીનો વડે ખોદકામ શરૂ કર્યું છે. આ કેસમાં જે વળાંક આવ્યો છે તે કોઈ ફિલ્મી વાર્તાથી કમ નથી.
શું છે સમગ્ર મામલો?
આશરે 35 વર્ષ પૂર્વે (1992માં) એક યુવતીની તેના પરિવારના જ સભ્યો દ્વારા હત્યા કરાઈ હોવાની ચોંકાવનારી બાતમી ક્રાઈમ બ્રાન્ચને મળી હતી. આ હત્યા બાદ પુરાવાનો નાશ કરવા માટે લાશને આરોપીના જ ઘરમાં આવેલા એક કૂવામાં દાટી દેવામાં આવી હતી. આ ગુનો દાયકાઓ સુધી દટાયેલો રહ્યો, પરંતુ કુદરતનો ન્યાય કંઈક અલગ જ હતો.
ડરામણા ભાસ અને અંધશ્રદ્ધાએ ખોલ્યું રહસ્ય
આ કેસમાં મોટો વળાંક ત્યારે આવ્યો જ્યારે આરોપીના પરિવારના સભ્યોને મૃતક યુવતીના વારંવાર ડરામણા ભાસ થવા લાગ્યા. આ પરિવાર ભારે ભય અને માનસિક તણાવમાં આવી ગયો હતો. આ ડરમાંથી મુક્તિ મેળવવા પરિવારે તાંત્રિક વિધિ અને અંધશ્રદ્ધાનો સહારો લીધો. રસપ્રદ વાત એ છે કે, આ દરમિયાન જૂના ગુનાની વાત બહાર આવી ગઈ. આ બાતમી મળતા જ ક્રાઈમ બ્રાન્ચ એક્શનમાં આવી હતી.
કંકાલની શોધમાં પોલીસનું સર્ચ ઓપરેશન
ક્રાઈમ બ્રાન્ચના જણાવ્યાનુસાર, પરિવારના જ સભ્યે હત્યા કરી લાશ કૂવામાં દાટી દીધી હોવાની માહિતીના આધારે અમે તપાસ શરૂ કરી છે. હાલ વટવા કુતુબ નગર ચોક ખાતે જમીનમાં દટાયેલા અવશેષો બહાર કાઢવા માટે સઘન ખોદકામ ચાલી રહ્યું છે. જો જમીનમાંથી માનવ હાડપિંજર મળી આવશે, તો આ કેસ ઉકેલાઈ જશે એ નક્કી છે.
વિસ્તારમાં ભારે કુતૂહલ
વટવામાં અચાનક પોલીસ અને જેસીબી મશીનો પહોંચતા સ્થાનિક લોકોમાં ભારે ચર્ચા જાગી છે. 35 વર્ષ બાદ કોઈ પાપ આ રીતે સામે આવશે તેવી કોઈએ કલ્પના પણ કરી નહોતી. હવે આખું શહેર એ જોવાની રાહ જોઈ રહ્યું છે કે ખોદકામમાં શું બહાર આવે છે.
