Jamnagar Crime : જામનગર તાલુકાના શાપર ગામે પ્રેમ લગ્ન કરનાર યુવાન પર તેના સસરા અને કાકાજી સસરાએ હુમલો કરતા વિસ્તારમાં ચકચાર મચી ગઈ છે. ટ્રક ડ્રાઇવિંગ કરીને પરિવારનું ગુજરાન ચલાવતો યુવાન હાલ ગંભીર ઈજાઓ સાથે જામનગરની જી.જી. હોસ્પિટલમાં સારવાર હેઠળ છે. આ બનાવ અંગે સિક્કા પોલીસે ફરિયાદ નોંધી આગળની તપાસ હાથ ધરી છે.
મળતી માહિતી મુજબ, શાપર ગામે રહેતા અને ટ્રક ડ્રાઇવિંગ કરતા સંજય હરેશભાઈ ભાંભી નામના 22 વર્ષના યુવાને લગભગ છ મહિના પહેલા પોતાના સંબંધીઓ હરેશભાઈ પરબતભાઈ રાઠોડની પુત્રી સુહાની (ઉંમર આશરે 20 વર્ષ) સાથે પરિવારની મરજી વિરુદ્ધ પ્રેમ લગ્ન કર્યા હતા. આ લગ્નને લઈને સસરા પક્ષમાં મનદુઃખ હતું.
ગઈકાલે બપોરના સમયે યુવાન સંજય પોતાના ફઈના દીકરા અજય પરસોતમભાઈ પરમાર સાથે મોટરસાયકલ પર સિક્કા પાટીયા તરફ જઈ રહ્યો હતો. ગામની સ્કૂલ નજીક પહોંચતા પાછળથી જ્યુપીટર મોટરસાયકલ પર આવેલા સસરા હરેશભાઈ અને તેમના મોટાભાઈ ભગવાનજીભાઈએ બંનેને રોક્યા હતા. બાદમાં ભગવાનજીભાઈએ લાકડાનો ધોકો લઈને યુવાન પર હુમલો કર્યો હતો.
હુમલાખોરોએ યુવાનને હાથ અને પગમાં માર મારતા તે નીચે પડી ગયો હતો. ત્યારબાદ બંનેએ કકમળીને ઢીકા-પાટાથી બેફામ મારમાર કર્યો હતો. વચ્ચે પડવા આવેલા અજયને પણ દૂર રહેવાની ધમકી આપવામાં આવી હતી. હુમલા દરમિયાન આરોપીઓએ “હવે પછી ગામમાં દેખાતો નહિ, નહિતર પતી જઈશ” તેવી જાનથી મારી નાખવાની ધમકી આપી હતી.
ઈજાગ્રસ્ત યુવાનને પહેલા સિક્કા સરકારી હોસ્પિટલમાં લઈ જવાયો હતો અને ત્યારબાદ વધુ સારવાર માટે 108 એમ્બ્યુલન્સ મારફતે જામનગરની જી.જી. હોસ્પિટલમાં ખસેડવામાં આવ્યો હતો, જ્યાં તેની સારવાર ચાલુ છે. ડૉક્ટરોએ જણાવ્યું હતું કે હાથ, પગ અને શરીરના ભાગોમાં મૂઢ ઈજાઓ થઈ છે. આ બનાવ અંગે પીડિત યુવાનની ફરિયાદના આધારે સિક્કા પોલીસે સસરા હરેશભાઈ તથા કાકાજી સસરા ભગવાનજીભાઈ સામે મારામારી અને ધમકી અંગે ગુનો નોંધ્યો છે. પોલીસે વધુ તપાસ શરૂ કરી છે.
