Iran-US Tension : અમેરિકા-ઈરાન વિવાદના કારણે છેલ્લા ઘણા સમયથી પેટ્રોલ-ડીઝલના ભાવ વધવાની અટકળો ચાલી રહી હતી. વિવાદના કારણે શેર માર્કેટ અને સોના-ચાંદીના ભાવ પણ ગગડતા રહ્યા હતા. એટલું જ નહીં મોંઘવારીએ પણ માઝા મૂકી હતી. જોકે હવે ભારત સહિત વિશ્વભરના નાગરિકો અને શેર માર્કેટ માટે આજે 6ઠ્ઠી મે મોટી રાહત લઈને આવ્યું છે. વાસ્તવમાં પશ્ચિમ એશિયામાં તણાવ ઘટવાના અહેવાલો સામે આવ્યા બાદ ક્રૂડ ઓઈલની કિંમતોમાં ભારે ઘટાડો અને શેર માર્કેટમાં અચાનક તેજી આવી છે. ખાસ વાત એ છે કે, સોના-ચાંદીના ભાવ (Gold-Silver Price)માં પણ વધારો થયો છે.
ક્રૂડ ઓઈલની કિંમતમાં છ ટકાનો ઘટાડો
મીડિયા રિપોર્ટ મુજબ, અમેરિકા અને ઈરાન યુદ્ધ સમાપ્ત કરવાની સમજૂતી પર રાજી થવાની તૈયારીમાં હોવાના અહેવાલો સામે આવ્યા છે. આ કારણે વૈશ્વિક માર્કેટને મોટી રાહત મળી છે. ક્રૂડ ઓઈલની કિંમતમાં છ ટકાનો ઘટાડો થયો છે. બીજી તરફ ઓપેક દેશો અને UAEએ ક્રૂડ ઓઈલનું પ્રોડક્શન વધારવાની જાહેરાત કરી છે.
આ પણ વાંચો : વધુ એક દિગ્ગજ IT કંપનીમાં 15000 કર્મચારીઓની છટણીનું લિસ્ટ તૈયાર, ભારતમાં દેખાશે અસર
વિશ્વમાં મોંઘવારીની અસર ઘટવાના સંકેત
ક્રૂડ ઓઈલના ભાવ ઘટવાથી વિશ્વમાં મોંઘવારી ઘટી શકે છે. ખાસ કરીને ભારતમાં સૌથી વધુ રાહત મળી શકે છે, કારણ કે ભારત પોતાની જરૂરીયાતમાં 80 ટકા ક્રૂડ ઓઈલ આયાત કરે છે. જો ક્રૂડની કિંમતો વધે તો નાણાં વધુ ચુકવવા પડે છે અને ઘટે તો આર્થિક રાહત મળે છે. ક્રૂડ ઓઈલના ભાવ વધુ હોવાથી ભારતીય એવિએશન સહિત અનેક સેક્ટરો પર કિંમત વધારવાનું દબાણ વધી જાય છે.
પ્રતિ બેરલ બ્રેંટ ક્રૂડ 7 ટકા ઘટ્યો
ઈરાન-અમેરિકા વચ્ચે ખતમ થતો વિવાદ અને ઓપેક દેશો તેમજ યુએઈએ ઓઈલ પ્રોડક્શન સતત વધારવાની જાહેરાત કર્યા બાદ ક્રૂડ ઓઈલની કિંમતમાં વઘાટો થઈ રહ્યો છે. હાલ બ્રેંટ ક્રૂડ 7 ટકા ઘટીને 102.51 ડૉલર પ્રતિ બેરલ પર ટ્રેડ થઈ રહ્યો છે.
પેટ્રોલ-ડીઝલના ભાવ નહીં વધે?
જ્યારે ક્રૂડ ઓઈલના ભાવ સતત વધી રહ્યા હતા, ત્યારે પેટ્રોલ-ડીઝલની કિંમતો (Petrol And Diesel Price) વધવાનું જોખમ વધી ગયું હતું. જોકે હવે ક્રૂડ ઓઈલના ભાવ (Crude Oil Price)માં ઘટાડો થતા પેટ્રોલ-ડીઝલના ભાવ વધવાની આશંકા ઘટી ગઈ છે. જો ઈરાન-અમેરિકા વચ્ચેનો વિવાદ ખતમ થશે તો હોર્મુઝ જળમાર્ગમાંથી ક્રૂડ ઓઈલ અને ગેસની સપ્લાય સંપૂર્ણ શરૂ થઈ જશે. આવી સ્થિતિમાં પેટ્રોલ-ડીઝલથી લઈને LPGમાં સામાન્ય નાગરિકો મોટી રાહત મળશે.
આ પણ વાંચો : 2026 દુનિયાનું સૌથી ગરમ વર્ષ સાબિત થશે… સૌથી મોટા વિજ્ઞાનીની ડરામણી ભવિષ્યવાણી
