– ચોમાસાના આગમન પહેલાં 16 રાજ્યોમાં વાવાઝોડાં સાથે ભારે વરસાદની ચેતવણી
– 10 રાજ્યોમાં 20 મે સુધી તાપમાનમાં પાંચ ડીગ્રીના વધારાની આગાહી સાથે ઓરેન્જ એલર્ટ ઃ મહારાષ્ટ્રનું અકોલા ૪૫.૯ ડિગ્રી સાથે સૌથી ગરમ શહેર
લખનઉ: ભારતમાં હજુ ચોમાસાના આગમનને થોડી વાર છે ત્યારે ઉત્તર પ્રદેશમાં આંધી-તોફાન, કમોસમી વરસાદ, કરાં અને આકાશી વિજળીએ ભારે હાહાકાર મચાવ્યો હતો. રાજ્યના ૨૬ જિલ્લામાં ખરાબ હવામાનના કારણે છેલ્લા ૨૪ કલાકમાં ૨૬ જિલ્લામાં ૧૨૦ લોકોનાં મોત થયા હતા જ્યારે ૧૦૦થી વધુ લોકો ઘાયલ થયા છે. આ સિવાય ૧૭૦ પશુઓનાં મોત થયા અને ૨૨૭થી વધુ મકાનોને નુકસાન પહોંચ્યું છે.
બીજીબાજુ ઉત્તર પ્રદેશના બાંદામાં ૪૫.૨ ડિગ્રી સે. તાપમાન સાથે કાળઝાળ ગરમીથી પણ લોકો ત્રાહિમામ પોકારી ગયા હતા. હવામાન વિભાગે ચોમાસાની શરૂઆત પહેલાં ૧૬ રાજ્યોમાં ભારે વરસાદની એલર્ટ આપી હતી. બીજીબાજુ દેશના અન્ય ભાગોમાં ગરમીનો કેર યથાવત્ રહ્યો હતો. મહારાષ્ટ્રનું અકોલા ૪૫.૯ ડિગ્રી સે. તાપમાન સાથે ગુરુવારે દેશનું સૌથી ગરમ શહેર હતું. હવામાન વિભાગે ૧૦ રાજ્યોમાં ૨૦ મે સુધીમાં તાપમાન પાંચ ડિગ્રી સુધી વધવા સાથે હીટવેવની ચેતવણી આપી છે.
ઉત્તર પ્રદેશમાં કમોસમી વરસાદ, આંધી-તોફાન અને કરાંએ ભારે હાહાકાર મચાવ્યો છે. આંધી, તોફાન, મૂશળધાર વરસાદના કારણે રાજ્યમાં સૌથી વધુ જાનહાનિ પ્રયાગરાજમાં થઈ છે, જ્યાં ૨૧ લોકોનાં મોત થયા હતા. આ સિવાય મિર્ઝાપુરમાં ૧૯, ભદોહીમાં ૧૬ અને ફતેહપુરામાં ૧૧ લોકોએ જીવ ગુમાવ્યા હતા. મુખ્યમંત્રી યોગી આદિત્યનાથે ખરાબ હવામાનના કારણે થયેલા મોત અને દુર્ઘટનાઓની નોંધ લેતા સરકારી તંત્રને ૨૪ કલાકમાં અસરગ્રસ્ત પરિવારોને રાહત પહોંચાડવા નિર્દેશો આપ્યા હતા.
હવામાન વિભાગે દિલ્હી, એનસીઆર સહિત ૧૬ રાજ્યોમાં આંધી સાથે મૂશળધાર વરસાદની ચેતવણી આપી છે. ઉત્તરમાં જમ્મુ-કાશ્મીર, લદ્દાખ, હિમાચલ પ્રદેશષ ઉત્તરાખંડથી લઈને પૂર્વોત્તર ભારતમાં નાગાલેન્ડ, મણિપુર, મિઝોરમ અને ત્રિપુરા તેમજ પૂર્વ ભારતમાં ગંગાના મેદાની વિસ્તારોમાં આગામી દિવસોમાં આંધી સાથે મુશળધાર વરસાદની આગાહી કરી છે.
બીજીબાજુ હવામાન વિભાગે દેશના કરોડો ખેડૂતો અને સામાન્ય જનતા માટે ચોમાસાની પ્રગતિ અંગે રાહતના સમાચાર આપ્યા હતા. હવામાન વિભાગે કહ્યું કે, બંગાળની ખાડીમાં બનેલા વેલ-માર્ક્ડ ઓછા દબાણના ક્ષેત્રના કારણે ચોમાસાની ગતિ ઝડપી થઈ છે અને આ સપ્તાહના અંત સુધીમાં તે અંદામાન-નિકોબારમાં પહોંચવાની પ્રબળ સંભાવના છે. હવામાન વિભાગના વિશ્લેષણ મુજબ ૧૬ મેને શનિવારે ચોમાસુ દક્ષિણ બંગાળની ખાડીના કેટલાક ભાગો, અંદામાન સાગર અને અંદામાન-નિકોબાર ટાપુ સુધી પહોંચી શકે છે. સામાન્ય રીતે ચોમાસુ ૨૦ મેએ અંદામાનમાં પહોંચે છે, પરંતુ આ વખતે ચોમાસાનું આગમન વહેલું થવાની શક્યતા છે.
જોકે, આ પહેલાં દેશના ઉત્તર-પશ્ચિમ ભારતમાં કાળઝાળ ગરમી લોકોને પરેશાન કરશે. ઉત્તર પ્રદેશમાં આંધી, તોફાન અને મૂશળધાર વરસાદના કેર વચ્ચે પૂર્વીય ઉત્તર પ્રદેશમાં કાળઝાળ ગરમીથી લોકો ત્રાહિમામ થઈ ગયા હતા. પૂર્વીય ઉત્તર પ્રદેશનું બાંદા ૪૫.૨ ડિગ્રી સે. સાથે રાજ્યનું સૌથી ગરમ શહેર હતું. જોકે, મહારાષ્ટ્રનું અકોલા ૪૫.૯ ડિગ્રી સે. સાથે દેશનું સૌથી ગરમ શહેર હતું.
હવામાન વિભાગે ૨૦ મે સુધી ૧૦ રાજ્યોમાં હીટવેવની એલર્ટ આપવા સાથે મહત્તમ તાપમાન પાંચ ડિગ્રી સુધી વધવાની ચેતવણી આપી હતી. પશ્ચિમ રાજસ્થાનમાં ૧૯ મે સુધીમાં અનેક જગ્યાઓ પર હીટવેવ અને કેટલાક વિસ્તારોમાં ભયાનક હીટવેવની સ્થિતિ રહેશે. રાજસ્થાનમાં ગુરુવારે ફલોદી ૪૫.૧ ડિગ્રી સાથે રાજ્યનું સૌથી ગરમ શહેર હતું. આ સિવાય બારમેર અને જેસલમેરમાં પણ તાપમાન ૪૫ ડિગ્રીથી વધુ હતું. મધ્ય ભારતમાં પણ તાપમાન ત્રણ ડિગ્રી સુધી વધી શકે છે. મધ્ય પ્રદેશ ત્રણ દિવસ સુધી રેેડ ઝોનમાં રહી શકે છે, જ્યાં કેટલાક વિસ્તારમાં તાપમાન ૪૫ ડિગ્રીથી ઉપર રહેશે. ઈન્દોર, ઉજ્જૈન તથા અન્ય જિલ્લાઓમાં મહત્તમ તાપમાન ૪૨થી ૪૫ ડિગ્રી ઉપર રહેશે. દિલ્હીમાં ગુરુવાર ૪૦.૬ ડિગ્રી સાથે આ મહિનાનો સૌથી ગરમ દિવસ નોંધાયો હતો.
રાજ્યમાં ૯૦ કિ.મી.ની ઝડપે પવન ફૂંકાયો
ઉત્તર પ્રદેશના બરેલીમાં આંધીમાં યુવક ઉડયાનો વીડિયો વાયરલ
ઉત્તર પ્રદેશમાં ભારે આંધી, તોફાન અને મૂશળધાર વરસાદના કારણે લોકો ભારે હાલાકીમાં મુકાઈ ગયા હતા. આંધી-તોફાનના કારણે પ્રતિ કલાક ૯૦ કિ.મી.ની ઝડપે પવન ફૂંકાયો હતો, જેના કારણે અનેક સ્થળે વૃક્ષો ઊખડી ગયા હતા અને વીજળીના થાંભલા પડી ગયા હતા. રાજ્યમાં આ આપદાના સમયમાં સોશિયલ મીડિયા પર એક વીડિયો વાયરલ થયો હતો, જેમાં બરેલીમાં આંધીથી બચવા માટે ટીન શેડને પકડીને ઊભેલો એક યુવક હવામાં ઊડયો હોવાનું જોવા મળ્યું હતું. એક યુઝરે આ વીડિયો શેર કરતા લખ્યું કે બરેલીના ભમૌરા વિસ્તારમાં નન્હે નામનો એક યુવક આંધીમાં ઊડી ગયો હતો. આ વીડિયો ખૂબ જ વાયરલ થયા પછી અંતે બરેલી પોલીસે ખુલાસો કરતા આ વીડિયોને ફેક ગણાવ્યો હતો. તેમણે કહ્યું કે, વાયરલ વીડિયો સાથે ચેડાં કરવામાં આવ્યા છે. વીડિયોને નાટકીય અને ડરામણો બનાવવા માટે તેમાં એડિટિંગ ટૂલ્સનો ઉપયોગ કરાયો છે.
