ટંકારાના સરાયા ગામે ચકચારી ઘટના : હત્યા કર્યા બાદ ગુનાહિત ભાવનાથી પીડાતા પતિએ ઝેરી દવા ગટગટાવી : ગંભીર હાલતમાં હોસ્પિટલ ખસેડાયો
મોરબી, : ટંકારા તાલુકાના સરાયા ગામની સીમમાં વાડીમાં ખેતમજૂરી કરતા એક પરપ્રાંતીય શ્રમિક દંપતી વચ્ચે આડાસંબંધની શંકાના આધારે થયેલા ઉગ્ર ઝઘડાએ લોહીયાળ સ્વરૂપ ધારણ કર્યું હતું. પત્નીને અન્ય પુરુષ સાથે સંબંધ હોવાની આશંકા રાખી રોષે ભરાયેલા પતિએ માથાના ભાગે ઈંટના ઘા મારી પત્નીની ઘાતકી હત્યા નીપજાવી હતી. બાદમાં પસ્તાવો થતાં અથવા પોલીસ પકડના ડરથી પોતે પણ ઝેરી દવા પીને આત્મહત્યા કરવાનો પ્રયાસ કર્યો હતો.
પોલીસ ફરિયાદમાં જણાવ્યા મુજબ, મૂળ મધ્યપ્રદેશના વતની અને હાલ સરાયા ગામની વાડીમાં ખેતમજૂરી કરતા લક્ષ્મણ રેવસિંગ કતીજા નામના શ્રમિકને તેની પત્ની રૂકમાંબેનના અન્ય કોઈ વ્યક્તિ સાથે પ્રેમ સંબંધ હોવાની પ્રબળ શંકા હતી. આ બાબતને લઈને અવારનવાર દંપતી વચ્ચે ક્લેશ થતો હતો. બનાવના દિવસે આ જ મુદ્દે બંને વચ્ચે ફરી ઉગ્ર બોલાચાલી અને ઝઘડો થયો હતો. આવેશમાં આવી ગયેલા લક્ષ્મણે ઉશ્કેરાઈ જઈને નજીકમાં પડેલી ઈંટ ઉપાડી પત્ની રૂકમાંબેનના માથાના ભાગે ઉપરાછાપરી મારી દીધી હતી. માથામાં ગંભીર ઈજાઓ થવાને કારણે અને વધુ પડતું લોહી વહી જવાને લીધે ઘટનાસ્થળે જ મોત નીપજ્યું હતું. ઘાતકી હત્યા બાદ આરોપી પતિ લક્ષ્મણે જાતે જ ઝેરી દવા ગટગટાવી લીધી હતી. ઘટનાની જાણ થતાં જ ટંકારા પોલીસ કાફલો ઘટનાસ્થળે દોડી ગયો હતો. પત્નીના મૃતદેહને પોસ્ટમોર્ટમ માટે ખસેડવા સાથે આરોપી પતિને પોલીસ બંદોબસ્ત હેઠળ તાત્કાલિક હોસ્પિટલમાં સારવાર માટે દાખલ કરવામાં આવ્યો હતો.
