પારકી દીકરી ઘરમાં આવી અને ઘરની દીકરીને ઉજાડી ગઇ ! : પુરૂષોતમ માસ અને વેકેશન કરવા પિયરીયે આવેલી પરિણીતાનું ખૂન : મંગેતર યુવતી અને તેના માતા-પિતા સામે હત્યાનો ગુનો દાખલ
પોરબંદર, : પોરબંદરમાં એક યુવાનની સગાઇ તોડવાની વાતના ડખ્ખામાં તેની મંગેતર અને મંગેતરના માતા-પિતા યુવાનના ઘરે આવી પહોંચ્યા હતા અને મારામારી થઇ હતી. જેમાં, પુરૂષોતમ માસ અને વેકેશન અનુસંધાને પિયરીએ આવેલી નણંદને ધક્કો મારી દેતાં કબાટમાં તેનું માથુ અથડાતા ગંભીર ઇજાને કારણે મોત નીપજ્યું છે જેથી મારામારીનો બનાવ હત્યામાં પલટાયો છે.
બિરલા હોલ પાછળ નેહા પેલેસ એપાર્ટમેન્ટમાં રહેતા હિત કીરીટભાઇ પોપટ નામના યુવાન ગરબા ક્લાસીસમાં ટ્રેનર તરીકે કામ કરતો હોઇ ચારેક વર્ષ પહેલા ગરબા શીખવા આવતી સુહાસી જગદીશ રાયચુરા સાથે તેનો પરિચય થતાં બંને એકબીજાને પસંદ કરવા લાગ્યા હતા. પરિવારોની સહમતિથી 11 મહિના પહેલા બંનેની સગાઇ થઇ હતી. છેલ્લા દોઢ બે મહિનાથી સુહાસીને હિતના પરિવારના સભ્યો સાથે ઝઘડા થતાં હોવાથી યુવકના પરિવારે લગ્ન કરવાની ના પાડી હતી.
આથી સુહાસી, તેની માતા શિલ્પાબેન તથા પિતા જગદીશભાઇ યુવકના ઘરે આવી લગ્ન કેમ નહીં કરો તેમ કહીં ગાળો બોલી ઝઘડો કરવા લાગ્યા. આ સમયે પુરૂષોતમ માસ અને વેકેશન કરવા આવેલી જૂનાગઢ રહેતી યુવકની મોટી બહેન વૃન્દાબેન વિશાલભાઇ નિર્મળ (ઉ.વ. 35) એક હાથમાં નાની બહેન હિતાંશીના નવ મહિનાના દીકરાને તેડી બીજા હાથેથી મારામારીનો વીડિયો ઉતારતી હતી.
આથી યુવતી તેના માતા-પિતાએ ઉશ્કેરાઇ જઇ અને સુહાસી તથા તેની માતાએ વૃન્દાબેનને જોરથી ધક્કો મારી કબાટમાં ભટકાડી દેતાં તેઓ બેભાન થઇ નીચે પડી ગયા હતા. યુવકના પરિવારજનોએ બૂમાબૂમ કરતા ત્રણેય ત્યાંથી નાશી છૂટયા હતા. ત્યારબાદ વૃન્દાબેનને હોસ્પિટલે લઇ જવાતા ફરજ પરના તબીબોએ તેને મૃત જાહેર કરી હતી. આ બનાવમાં સુહાસી તેની માતા શિલ્પા તથા પિતા જગદીશ રાયચુરા સામે હત્યાનો ગુનો નોંધાયો છે.
