વાહન ઓવરટેક કરવાના મુદ્દે ખાર રાખી
રિક્ષા અને ટુ-વ્હીલરમાં હથિયારો સાથે ધસી જઇ ધમકી આપી હુમલો કરનાર આઠ શખ્સો સામે નોંધાતો ગુનો
રાજકોટ: રાજકોટ નજીક કાગદડી ગામના પાટીયા પાસે આવેલી એક હોટલ નજીક ભગવાનજીભાઇ ઘેલાભાઇ હાડગરડા (ઉ.વ.૩૦, રહે. વાછકપર બેડી ગામ) અને તેના ભાઇ સહિત પાંચ પર આઠ શખ્સોએ છરી અને ધોકા વડે જીવલેણ હુમલો કરી જાનથી મારી નાખવાની ધમકી આપ્યાની કુવાડવા રોડ પોલીસ મથકમાં ફરિયાદ નોંધાઇ છે.
પોલીસે આ મામલે ભગવાનજીભાઇની ફરિયાદ પરથી અજય નાનજી ટોયટા તેના ભાઇ વિજય, ભરત, કાના વિરમ હાડગરડા, તેના ભાઇ લાલા, સુજીત સુરેશ વઢુકીયા (રહે. વાછકપર બેડી), મુન્ના ગીગા ફાંગલીયા (રહે. વછકપર તા.ટંકારા) અને સુરેશ ગીગા ફાંગલીયા (રહે. હડાળા ગામ પાસે, રાજકોટ) સામે હત્યાના પ્રયાસ સહિતની કલમ હેઠળ ગુનો દાખલ કરી ધરપકડ કરવા ચક્રો ગતિમાન કર્યા હતા.
પોલીસે જણાવ્યું કે, ભગવાનજીભાઇ તેના નાના ભાઇ રાહુલ ઉપરાંત કાકાના દિકરા હરેશ નાગજીભાઇ હાડગરડા, બીજા કાકાના દીકરા વિશાલ કમલેશભાઇ અને ભત્રીજા અક્ષય મોતીભાઇ હાડગરડા સાથે કાગદડી ગામના પાટીયા પાસે આવેલી હોટલ નજીક હતા ત્યારે ટુ-વ્હીલર અને રિક્ષામાં ધસી આવેલા આરોપીએ છરી અને ધોકા વડે જીવલેણ હુમલો કરી ઢીકાપાટુનો માર મારી જાનથી મારી નાખવાની ધમકી આપી હતી.
આ હુમલામાં બંને ભાઇઓ સહિત પાંચેયને ઇજા થતાં હોસ્પિટલમાં ખસેડાયા હતા. ભગવાનજીભાઇના કાકાના દીકરા હરેશભાઇને રસ્તા પર વાહન ઓવરટેક કરવા બાબતે આરોપી અજય સાથે બોલાચાલી થઇ હતી. તે બાબતનો ખાર રાખી આરોપીઓએ હુમલો કર્યો હતો.
