Vadodara Corporation : વડોદરા શહેરમાં લારી-ગલ્લા ધારકો અને સ્ટ્રીટ વેન્ડર્સ માટે નવી ટાઉન વેન્ડિંગ કમિટીની રચના કરવામાં આવનાર છે. શહેરમાં નવા હોકિંગ ઝોન અને નોન-હોકિંગ ઝોન નક્કી કરવા તેમજ વેન્ડર્સને લગતી ફરિયાદોનું નિરાકરણ લાવવા માટે સરકારની માર્ગદર્શિકા મુજબ આ પ્રક્રિયા હાથ ધરવામાં આવશે.
અગાઉ વર્ષ 2017માં શહેરના તમામ સ્ટ્રીટ વેન્ડર્સનો વિગતવાર સર્વે કરવામાં આવ્યો હતો. હવે ટૂંક સમયમાં ફરી એકવાર નવેસરથી સર્વે હાથ ધરવામાં આવશે. નવા સર્વે દરમિયાન 2017ના ડેટાબેઝ અને માહિતીનો પણ ઉપયોગ કરવામાં આવશે.
સરકારની ગાઇડલાઇન મુજબ નવા સર્વેમાં નોંધાયેલા સ્ટ્રીટ વેન્ડર્સ માટે ચૂંટણી યોજવામાં આવશે. ચૂંટણી દ્વારા પસંદ થયેલા સભ્યોને ટાઉન વેન્ડિંગ કમિટીમાં સ્થાન આપવામાં આવશે. કમિટીમાં સરકારી અધિકારીઓ, બિનસરકારી સભ્યો, એનજીઓ પ્રતિનિધિઓ તેમજ ચૂંટાયેલા વેન્ડર પ્રતિનિધિઓનો સમાવેશ કરવામાં આવશે.
નવી ટાઉન વેન્ડિંગ કમિટી શહેરમાં હોકિંગ અને નોન-હોકિંગ ઝોન નક્કી કરશે. ઉપરાંત દરેક સ્ટ્રીટ વેન્ડરને ઓળખપત્ર આપવામાં આવશે. શહેરી ફેરીયાઓ માટેની માસિક પરવાના ફી તેમજ વેન્ડિંગ પ્રવૃત્તિ માટે પ્રતિબંધિત વિસ્તારો પણ કમિટી દ્વારા નક્કી કરવામાં આવશે. નવી કમિટીની રચના ન થાય ત્યાં સુધી સ્ટ્રીટ વેન્ડર્સને લગતી કામગીરી સામાન્ય સભા દ્વારા મંજૂર કરવામાં આવેલી પ્રોવિઝનલ કમિટીના નિર્ણય મુજબ ચાલુ રહેશે.
મહાનગરપાલિકા દ્વારા અગાઉ નક્કી કરાયેલા શહેરના 14 મુખ્ય માર્ગો પર સ્ટ્રીટ વેન્ડિંગ પ્રવૃત્તિ પર પ્રતિબંધ યથાવત રાખવામાં આવ્યો છે. જ્યારે અન્ય વિસ્તારોમાં હાલ જે સ્થળે સ્ટ્રીટ વેન્ડર્સ ધંધો કરે છે ત્યાં સાંજે 7 વાગ્યાથી રાત્રે 11 વાગ્યા સુધી ધંધો કરવાની મંજૂરી રહેશે. રાત્રે 11 વાગ્યા બાદ તમામ વેન્ડર્સે પોતાની લારી, પથારા અને અન્ય સામાન દૂર કરીને સ્થળ ખુલ્લું રાખવાનું રહેશે.
