Bitcoin dips below $60,000 as investors shift: હમણા સુધી જે બિટકોઈન રોકાણકારોનો સૌથી લાડકો એસેટ હતો, અમેરિકન પ્રમુખ ડોનાલ્ડ ટ્રમ્પની જીત બાદ જેણે આસમાનને આંબ્યું હતું, તે અત્યારે રોકાણકારોને રડાવી રહ્યો છે. ગયા વર્ષે ઓક્ટોબરમાં $126,000ની સર્વોચ્ચ સપાટી પર પહોંચ્યા પછી, બિટકોઈન તેની અડધાથી વધુ કિંમત ગુમાવી ચૂક્યો છે. ન્યૂ યોર્કના ટ્રેડિંગ કલાકોમાં આ સૌથી મોટી ક્રિપ્ટોકરન્સી 7% જેટલી ઘટીને $59,101 સુધી પહોંચી ગઈ છે. લગભગ 2 વર્ષમાં પહેલીવાર બિટકોઈન $60,000ની સપાટી તોડીને નીચે આવ્યો છે. આ ઘટાડાથી સામાન્ય રોકાણકારો મૂંઝવણમાં છે કે હવે ક્રિપ્ટો ખરીદવું, પકડી રાખવું કે બહાર નીકળી જવું?
બિટકોઈન કેમ તૂટ્યો?
માર્કેટના નિષ્ણાતોના જણાવ્યા મુજબ, આ કોઈ કાયમી કડાકો નથી પરંતુ એક કુદરતી માર્કેટ સાયકલ (Market Cycle) છે. એના મુખ્ય કારણો નીચે મુજબ છે.
– પ્રોફિટ બુકિંગ અને નવો ટ્રેન્ડ: મોટા અને સંસ્થાગત રોકાણકારો અત્યારે ક્રિપ્ટોમાંથી નફો વસૂલ કરી રહ્યા છે. તેઓ આ પૈસા અત્યારે ભારે ડિમાન્ડમાં ચાલી રહેલા સેક્ટર્સ જેવા કે AI (આર્ટિફિશિયલ ઇન્ટેલિજન્સ), ડિફેન્સ (સંરક્ષણ), એનર્જી અને ઈન્ફ્રાસ્ટ્રક્ચરમાં લગાવી રહ્યા છે.
– સોના તરફ વધતું આકર્ષણ: વૈશ્વિક અનિશ્ચિતતાને કારણે રોકાણકારો ફરી એકવાર સૌથી સુરક્ષિત ગણાતા સોના તરફ વળ્યા છે, જેથી ક્રિપ્ટો માર્કેટમાંથી લિક્વિડિટી ઓછી થઈ છે.
– વ્યાજદરોની અંગેની અસમંજસ: યુએસ ફેડરલ રિઝર્વ વ્યાજદરમાં ઘટાડો કરશે કે નહીં, તેને લઈને અનિશ્ચિતતા છે. જ્યારે વ્યાજદર ઊંચા રહેવાની શક્યતા હોય, ત્યારે બિટકોઈન જેવા હાઈ-રિસ્ક માર્કેટમાંથી પૈસા બહાર નીકળી જતા હોય છે.
સામાન્ય રોકાણકારોએ હવે શું કરવું જોઈએ?
આવા કપરા સમયમાં ગભરાઈને ભાવનાત્મક નિર્ણયો લેવાને બદલે નિષ્ણાતો રોકાણકારોને ચોક્કસ વ્યૂહરચના અપનાવવાની સલાહ આપે છે.
– SIP મોડ અપનાવો: માર્કેટમાં ઉતાર-ચઢાવ વચ્ચે એકસાથે મોટું રોકાણ કરવાને બદલે શિસ્તબદ્ધ રીતે SIP (Systematic Investment Plan) દ્વારા રોકાણ કરો. આનાથી ખરીદીની સરેરાશ કિંમત (Average Cost) નીચી આવશે અને જોખમ ઘટશે.
– પોર્ટફોલિયો સંતુલિત રાખો (2% થી 5% નિયમ): સામાન્ય રોકાણકારોએ પોતાના કુલ પોર્ટફોલિયોના માત્ર 2% થી 5% જેટલું જ મર્યાદિત રોકાણ ક્રિપ્ટોમાં રાખવું જોઈએ, જેથી મોટું નુકસાન ન થાય. માત્ર ખૂબ અનુભવી અને બજારને સમજતા લોકોએ જ એમાં 5% થી 10% રોકવાનું સાહસ કરવું જોઈએ.
– કચરો સાફ થયો, ગુણવત્તા પર ધ્યાન આપો: આ સુધારાને કારણે માર્કેટમાંથી સટ્ટાકીય ‘મીમ ટોકન્સ’ ગાયબ થઈ રહ્યા છે, જ્યારે મજબૂત ફાઉન્ડેશન ધરાવતા પ્રોજેક્ટ્સ ટકી રહ્યા છે. રોકાણ માટે બિટકોઈનને જ મુખ્ય હોલ્ડિંગ રાખવું હિતાવહ છે.
જાણી લો શું છે નિષ્ણાતની સલાહ
આગામી દિવસોમાં જોવાનું રહેશે કે બિટકોઈન $60,000-$62,000ની રેન્જમાં સપોર્ટ મેળવી શકે છે કે નહીં. બજારમાં આવા ઘટાડા સામાન્ય છે, આથી ટૂંકા ગાળાના નુકસાનથી ડરીને ખોટા નિર્ણયો ન લો અને લાંબા ગાળાના જોખમના પરિબળો પર ધ્યાન આપો.
નોંધ: આ માહિતી માત્ર શૈક્ષણિક હેતુ માટે છે. ક્રિપ્ટો માર્કેટ જોખમી છે, રોકાણ કરતા પહેલાં ફાઇનાન્સિયલ એડવાઇઝરની સલાહ લેવી જરૂરી છે.
