વડોદરા,હાથીખાના વિસ્તારમાં ત્રાટકેલી ચોર ટોળકીએ એક સાથે ૧૧ દુકાનોના તાળા તોડી ૧૧ લાખથી વધુની ચોરી ગઇ હતી. જે ટોળકીને પકડવા માટે સ્થાનિક પોલીસ ઉપરાંત ડીસીબી અને અન્ય બ્રાંચની ટીમ પણ દોડધામ કરી રહી છે. પરંતુ, ચોર હજી પકડાયા નથી.
ચોર ત્રિપુટી હાથીખાનાના ગેટની બહાર બાઇક મૂકીને ગેટની નીચેથી અંદર ઘૂસે છે. ત્યારબાદ મોંઢે માસ્ક અને હાથમાં મોજા પહેરીને ચોર એક પછી એક દુકાનના તાળા તોડી ચોરી કરે છે. ૧૧ દુકાનોના તાળા તોડી ચોરી કરનાર ટોળકી રાત્રે ૩ઃ ૩૫ કલાકે અંદર જાય છે અને ૪ઃ ૩૦ કલાકે બહાર નીકળે છે. વેપારી અનિલ પ્રભુદાસ રોહરાની ફરિયાદના આધારે કુંભારવાડા પોલીસે રોકડા ૧૧.૧૭ લાખની ચોરી અંગે ફરિયાદ નોંધી હતી. પોલીસની અલગ – અલગ ટીમ દ્વારા સીસીટીવી ફૂટેજની ચકાસણી કરી આરોપીઓ જે બાઇક પર આવ્યા હતા. તેની માહિતી મેળવવામાં આવી રહી છે.
