અમદાવાદ : ક્રૂડ ઓઇલ ફુગાવો, પેકેજિંગ મટિરિયલ્સ અને ઇંધણના ખર્ચમાં વધારા વચ્ચે, સાબુ, ડિટર્જન્ટ, બિસ્કિટ, પેકેજ્ડ ફૂડ અને પીણાંના ભાવ વધી શકે છે. દેશની મુખ્ય એફએમસીજી કંપનીઓ વધતા ખર્ચને કારણે નફાકારકતા પરના દબાણને ઘટાડવા માટે તબક્કાવાર ભાવ વધારવાની તૈયારી કરી રહી છે.
એફએમસીજી કંપનીના સુત્રોએ તાજેતરમાં સંકેત આપ્યો હતો કે તેઓએ પહેલાથી જ ભાવમાં ત્રણથી પાંચ ટકાનો વધારો કર્યો છે અને જો ખર્ચનું દબાણ ચાલુ રહે તો તે વધુ વધી શકે છે. કંપનીઓનું કહેવું છે કે પશ્ચિમ એશિયામાં ચાલી રહેલા ભૂરાજકીય તણાવે વૈશ્વિક પુરવઠા શૃંખલાઓને અસર કરી છે, જેના કારણે કાચા માલ, લોજિસ્ટિક્સ અને પેકેજિંગ ખર્ચમાં વધારો થયો છે. નબળા રૂપિયાએ પણ દબાણમાં વધારો કર્યો છે. આ અસર ખાદ્ય ઉત્પાદનો, વ્યક્તિગત સંભાળ, પીણાં અને ઘરગથ્થુ ઉપકરણો સહિત અનેક ક્ષેત્રોમાં અનુભવાઈ રહી છે.
કંપનીઓ નફાકારકતા જાળવવા માટે પેકેજ્ડ ઉત્પાદનોમાં ભાવમાં વધારો અને વોલ્યુમમાં ઘટાડો જેવી વ્યૂહરચના અપનાવી રહી છે. જોકે, વેચાણ પર અસર ઓછી કરવા માટે રૂા. ૫, રૂા ૧૦ અને રૂા. ૧૫ ના નાના પેક કદ જાળવવાના પ્રયાસો કરવામાં આવી રહ્યા છે.
