Vadodara Corporation : વડોદરાના વાડી વિસ્તારમાં ગટરમિશ્રિત પાણીના વિતરણની સમસ્યા વિકટ બનતા સામાજિક કાર્યકર પંકજ દર્વેએ વડોદરા મ્યુનિસિપલ કોર્પોરેશનના કમિશનરને રજૂઆત કરી સમસ્યાનો વહેલી તકે ઉકેલ લાવવા માગ કરી છે.
રજૂઆત મુજબ, સમગ્ર વાડી વિસ્તારમાં વર્ષોથી દૂષિત પાણીની સમસ્યા યથાવત છે, પરંતુ પોમલી ફળિયું, ખેડકર ફળિયું, વાડી રંગમહાલ સહિતના વિસ્તારોમાં કેટલાક વિસ્તારોમા છેલ્લા દોઢ મહિનાથી સ્થિતિ વધુ વિકટ બની છે. આ વિસ્તારોમાં નળમાંથી કાળા રંગનું અને દુર્ગંધ મારતું પાણી આવી રહ્યું છે, જેથી રહિશોને પીવાના પાણી માટે જગ અને ટેન્કરનો સહારો લેવો પડી રહ્યો છે. નિયમિત રીતે વેરો ભરતા નાગરિકોને શુદ્ધ પીવાનું પાણી ઉપલબ્ધ કરાવવાની કોર્પોરેશનની જવાબદારી છે. જો વહેલી તકે સમસ્યાનો કાયમી ઉકેલ નહીં લાવવામાં આવે તો વિસ્તારમાં પાણીજન્ય રોગચાળો ફાટી નીકળવાની શક્યતા છે.
