પશ્ચિમ રેલવેના ભાવનગર મંડળમાં મંડળ રેલ પ્રબંધક શ્રી દિનેશ વર્માના માર્ગદર્શન હેઠળ 17 સપ્ટેમ્બરથી 2 ઓક્ટોબર 2026 સુધી ‘સ્વચ્છતા હી સેવા-2026’ અભિયાનનું આયોજન કરવામાં આવ્યું હતું. આ અભિયાન દરમિયાન સ્વચ્છતા, કચરા વ્યવસ્થાપન, જનજાગૃતિ, શ્રમદાન, વૃક્ષારોપણ તેમજ સફાઈ મિત્રોના સ્વાસ્થ્ય અને સુરક્ષા પર વિશેષ ભાર મૂકવામાં આવ્યો હતો.
વરિષ્ઠ મંડળ વાણિજ્ય પ્રબંધક શ્રી અતુલ કુમાર ત્રિપાઠીએ જણાવ્યું હતું કે અભિયાન અંતર્ગત કચરાના 19 નિર્ધારિત સંવેદનશીલ સ્થળોનું કાયાકલ્પ કરીને 7,400 ચોરસ મીટર વિસ્તારની સફાઈ કરવામાં આવી હતી અને 3.549 મેટ્રિક ટન કચરો દૂર કરવામાં આવ્યો હતો. વિવિધ જાગૃતિ અને જનભાગીદારીની પ્રવૃત્તિઓ દ્વારા સ્વચ્છતાનો સંદેશ પ્રસારિત કરવામાં આવ્યો હતો.
સફાઈ મિત્રો માટે આરોગ્ય શિબિરનું આયોજન કરીને 27 લોકોની આરોગ્ય તપાસ કરવામાં આવી હતી તેમજ સંરક્ષા કિટનું વિતરણ કરવામાં આવ્યું હતું. આ ઉપરાંત, સામૂહિક શ્રમદાન, કચરાનું વર્ગીકરણ અને વૃક્ષારોપણ જેવી પ્રવૃત્તિઓ પણ યોજવામાં આવી હતી. અભિયાન દરમિયાન કુલ 35 વ્યક્તિઓ/એકમોને સન્માનિત પણ કરવામાં આવ્યાં હતાં.
‘સ્વચ્છતા હી સેવા-2026’ અભિયાન બાદ 1 થી 15 ઓક્ટોબર 2026 સુધી ‘સ્વચ્છતા પખવાડિયા-2026’ની ઉજવણી કરવામાં આવી રહી છે. આ અંતર્ગત મંડળમાં નિયમિત સફાઈ, નિરીક્ષણ અને જાગૃતિની પ્રવૃત્તિઓ સાથે ગંદકી ફેલાવનારાઓ સામે કાર્યવાહી તથા મુસાફરોનું કાઉન્સેલિંગ કરવામાં આવી રહ્યું છે.અત્યાર સુધીમાં આશરે 57 વ્યક્તિઓ પાસેથી કુલ ₹41,000નો દંડ વસૂલવામાં આવ્યો છે.
ભાવનગર મંડળ સ્વચ્છ, સુરક્ષિત અને પર્યાવરણને અનુકૂળ રેલવે પરિસર સુનિશ્ચિત કરવા તેમજ સ્વચ્છતાને જનભાગીદારી સાથે જોડવા માટે સતત પ્રયત્નશીલ છે.
