CA Exam Result Declared: ICAI (ઇન્સ્ટિટ્યૂટ ઓફ ચાર્ટર્ડ એકાઉન્ટન્ટ્સ ઓફ ઇન્ડિયા) દ્વારા સપ્ટેમ્બરમાં લેવાયેલી CA પરીક્ષાઓનાં પરિણામો જાહેર કરવામાં આવ્યાં છે. જેમાં ફાઇનલ એક્ઝામિનેશન (બંને ગ્રુપ)નું પરિણામ 16.23% (16,800માંથી 2,727 પાસ), ઇન્ટરમીડિયેટ એક્ઝામ (બંને ગ્રુપ)નું પરિણામ 10.06% (36,398માંથી 3,663 પાસ) અને ફાઉન્ડેશન એક્ઝામનું પરિણામ 14.78% (98,827માંથી 14,609 પાસ) રહ્યું છે. આ ઉપરાંત, રાજકોટના ઉમેદવાર જિગર રાચ્છે ભારતમાં 20મો રેન્ક પ્રાપ્ત કર્યો છે.
98,827 વિદ્યાર્થીઓમાંથી 14,609 ઉમેદવારો પાસ
ફાઉન્ડેશન પરીક્ષામાં આ સત્રે 98,827 વિદ્યાર્થીઓએ આપી હતી, જેમાંથી માત્ર 14,609 ઉમેદવારો પાસ થયા છે, જેનો એકંદર પાસ થવાનો દર 14.78% રહ્યો છે. પુરુષ ઉમેદવારોનો પાસ થવાનો દર (15.74%) સ્ત્રી ઉમેદવારો (13.76%) કરતાં સહેજ વધુ રહ્યો છે. ચેન્નાઈની એલ. રાજલક્ષ્મી 360 માર્ક્સ (90%) સાથે સમગ્ર ભારતમાં પ્રથમ ક્રમે આવી છે, જ્યારે બીજા ક્રમે પ્રેમ અગ્રવાલ (354 માર્ક્સ) અને ત્રીજા ક્રમે નીલ રાજેશ શાહ (353 માર્ક્સ) છે.
ICAIની ઓફિશિયલ વેબસાઇટ પર પરિણામો જોઈ શકાશે
આ પરીક્ષાઓ 3 સપ્ટેમ્બરથી 22 સપ્ટેમ્બર દરમિયાન યોજાઈ હતી અને વિદ્યાર્થીઓ હવે તેમના રજિસ્ટ્રેશન નંબર અને રોલ નંબરનો ઉપયોગ કરીને ICAIની ઓફિશિયલ વેબસાઇટ icai.nic.in પર આ પરિણામો જોઈ શકશે.
2026 સત્રનું રજિસ્ટ્રેશન શરુ
આ ઉપરાંત જાન્યુઆરી 2026 સત્ર માટેની રજિસ્ટ્રેશન જાહેરાત પણ ICAI દ્વારા કરી દેવામાં આવી છે. ઈચ્છુક વિદ્યાર્થીઓ આ પરીક્ષાઓ માટે 3 નવેમ્બરથી 16 નવેમ્બર સુધી ઓનલાઈન રજિસ્ટ્રેશન કરાવી શકે છે. આ પરીક્ષાઓનું આયોજન 5 જાન્યુઆરીથી 24 જાન્યુઆરી દરમિયાન કરવામાં આવશે.
