વડોદરાઃ પીએમ આવાસ યોજનાના મકાનો રીસેલમાં આપવાના નામે કોર્પોરેશનના ત્રણ હેલ્થવર્કર સાથે ઠગાઇ કરનાર ભેજાબાજને સમા પોલીસે ઝડપી પાડતાં તેને જ્યુડિશિયલ કસ્ટડીમાં મોકલવામાં આવ્યો છે.
સમા મામલતદાર કચેરી પાસે પીએમ આવાસ યોજનાના ૧૫ જેટલા મકાનો રીસેલ કરવાના હોવાનું કહી અને તેના કોર્પોરેશનના અધિકૃત એજન્ટ તરીકે આઇકાર્ડ બનાવી તરલ પઢિયારે સમા અર્બન હેલ્થ સેન્ટરમાં નોકરી કરતા પ્રિયંકાબેન,દક્ષાબેન તેમજ સોનલબેનને ફસાવી રૃ.૬.૧૧ લાખ પડાવી લીધા હતા.
તરલે મકાન એલોટમેન્ટ,લોન પ્રોસેસ, કોર્પોરેશનના બેન્ક એકાઉન્ટની સહી-સિક્કાવાળી રસીદ સહિતના દસ્તાવેજો તૈયાર કર્યા હતા.જેથી સમાના પીઆઇ બીબી કોડિયાતરે ગુનો નોંધ્યો હતો.
પોલીસે આરોપી તરલ મઇજીભાઇ પઢિયાર(અર્થ આઇકોન,ખોડિયાર નગર, ન્યુ વીઆઇપી રોડ)ને ઝડપી પાડી પૂછપરછ કરતાં એક વર્ષ પહેલાં બનેલા બનાવની રકમ તેણે વાપરી નાંખી હોવાની કબૂલાત કરી હતી.પાંચ વર્ષ પહેલાં ઓસ્ટ્રેલિયા ગયેલો તરલ ત્યાં સેટ થઇ શક્યો નહતો અને થોડા સમય બાદ રીટર્ન થયો હતો.તેણે વીઆઇપી રોડ પર વીઆઇપી વ્યૂ કોમ્પ્લેક્સના સાયબર કાફેમાં દસ્તાવેજો બનાવ્યા હોવાથી પોલીસે સીપીયુ કબજે લીધું હતું.રિમાન્ડ પુરા થતાં કોર્ટે તેને જ્યુ.કસ્ટડીમાં મોકલી આપ્યો છે.
ઇન્ફોસિસના મેનેજર બની ગોત્રીની શિક્ષિકા પાસે FD પર વધુ વ્યાજના નામે ૧૩ લાખ પડાવ્યા હતા
તરલ પઢિયાર સામે ત્રણ વર્ષ પહેલાં પણ ગોરવા પોલીસ સ્ટેશનમાં ફરિયાદ નોંધાઇ હતી.
પોલીસ સૂત્રોમાંથી મળતી માહિતી મુજબ,તરલ પઢિયારે ગોત્રી ટીબી હોસ્પિટલ પાછળ રહેતી સ્કૂલ સમયની પરિચિત શિક્ષિકા ને પોતે હાલમાં ઇન્ફોસિસનો વડોદરાનો મેનેજર હોવાની ઓળખ આપી હતી.
તેણે એફડી પર સારું વ્યાજ અપાવવાના નામે શિક્ષિકા તેમજ તેમના માતા પાસેથી રૃ.૧૩.૫૦ લાખ લીધા હતા અને પાકતી મુદતે એક એફડીના રૃ.૫૪૪૫૦ને બદલે રૃ.૫૦ હજાર પરત કરી બાકીના ૧૩લાખ વગે કરતાં શિક્ષિકાએ ફરિયાદ નોંધાવી હતી.
દોઢ મહિના પહેલાં પણ દુકાનોમાં ચોરીઓ કરતો કેનેડા રિટર્ન યુવક પકડાયો હતો
દોઢ મહિના પહેલાં પણ ગોરવા પોલીસે કેનેડાથી રિટર્ન થયેલા એક યુવકને ચોરીના બનાવમાં પકડયો હતો.
સારાભાઇ કેમ્પસમાં ડ્રાયફ્રુટ્સની દુકાન નું શટર તોડી રૃ.૧.૯૦ લાખની રોકડ ચોરી અને આ જ કેમ્પસમાં એક રેસ્ટોરાંમાંથી ૨૩ હજારની કેશ ચોરીના બનાવમાં ગોરવાના પીઆઇ કિરિટ લાઠિયાએ કેનેડાથી પરત ફરેલા આણંદના ક્રિયેશ પટેલની ધરપકડ કરી હતી.
ઉપરોક્ત બંને ચોરી ઉપરાંત આરોપીએ ઇનઓરબિટ મોલ પાસેથી એક બાઇક અને ભરૃચના મેડિકલ સ્ટોરમાંથી પણ રોકડા રૃ.૪૭ હજાર અને કોમ્પ્યુટરની હાર્ડડિસ્ક ચોર્યાની વિગતો ખૂલી હતી.કેનેડામાં એક્સિડન્ટ બાદ ડ્રાઇવિંગ લાયસન્સ રદ થતાં યુવકને રિટર્ન થવું પડયું હતું.
