ગાંધીનગર, સંજીવ રાજપૂત, એબીએનએસ: ગુજરાતના વંચિત અને શ્રમિક એવા દેવીપૂજક સમાજ સહિત એનટીડીએનટી હેઠળ આવતી તમામ જાતિના વિદ્યાર્થીઓને સ્કોલરશિપ અને શૈક્ષણિક સહાયમાં ન્યાય અપાવવા માટે ‘લોક સુરાજ’ સંગઠન દ્વારા મુખ્યમંત્રી સમક્ષ ખાસ રજૂઆત કરવામાં આવી છે. ‘વિમુક્ત, ધૂમંતું આદિજાતિ એકતા મંચ, ગુજરાત’ના અધ્યક્ષ પ્રકાશકુમાર રમેશચંદ્ર શાહ દ્વારા કરાયેલી આ રજૂઆતમાં જણાવાયું છે કે, અત્યંત ગરીબ અને મજૂર પરિવારોમાંથી આવતા એનટીડીએનટી સમાજના બાળકો માટે સરકારી સ્કોલરશિપ જ આગળ વધવાનો એકમાત્ર સહારો છે.
આ આવેદનપત્રમાં વર્ષ 2012ના જૂના લાભદાયી નિયમોને પુનઃસ્થાપિત કરવા માટે મુખ્ય 4 માગણી કરવામાં આવી છે. જેમાં પાત્ર વિદ્યાર્થીઓને સમયસર 100% સ્કોલરશિપ આપવી, અભ્યાસમાં વિરામ માટે 9 વર્ષ સુધીનો શૈક્ષણિક ગેપ માન્ય રાખવો, પારદર્શિતા માટે અલગ સ્કોલરશિપ પોર્ટલ બનાવવું અને વર્ષ 2025ના નવા પરિપત્રોની તાત્કાલિક ઉચ્ચસ્તરીય સમીક્ષા કરવાનો સમાવેશ થાય છે.
પ્રેસનોટના અંતમાં સ્પષ્ટ કરાયું છે કે, આ કોઈ રાજકીય પ્રશ્ન નથી પરંતુ દેવીપૂજક સહિત એનટીડીએનટી હેઠળ આવતા સમાજના હજારો વિદ્યાર્થીઓના શિક્ષણ અને ઉજ્જવળ ભવિષ્યનો સંવેદનશીલ મુદ્દો છે. જો આજે આ બાળકો ભણશે, તો જ સમાજ અને દેશનો વિકાસ થશે, જેથી સરકારે આ અંગે તાત્કાલિક યોગ્ય નિર્ણય લેવો જોઈએ.
