Surat : સુરત પાલિકા સહિત સરકારી શાળાઓમાં વિદ્યાર્થીઓની સંખ્યા વધે, વાલીઓનો વિશ્વાસ મજબૂત બને અને શિક્ષણ સમિતિની શાળાને વધુ પ્રાધાન્ય મળે તે માટે રાજ્યભરમાં પ્રવેશોત્સવની ઉજવણી થઈ રહી છે. પરંતુ સુરતમાં આ જ પ્રવેશોત્સવ દરમિયાન શિક્ષણ સમિતિના અધ્યક્ષની હાજરી ચર્ચાનો વિષય બની છે. પાલિકા સંચાલિત શાળાઓમાં નવા વિદ્યાર્થીઓને પ્રવેશ અપાવ્યા બાદ તેઓ ગાંધીનગરથી આવેલા અધિકારી સાથે ખાનગી અંગ્રેજી માધ્યમની શાળાના કાર્યક્રમમાં પહોંચ્યા હતા. એક તરફ અન્ય પદાધિકારીઓ અને અધિકારીઓ સરકારી શાળાઓમાં પ્રવેશોત્સવને સફળ બનાવવા માટે દોડધામ કરી રહ્યા હતા, ત્યારે શિક્ષણ સમિતિના સર્વોચ્ચ પદાધિકારીની ખાનગી શાળામાં હાજરીએ તેમની પ્રાથમિકતા સામે ગંભીર સવાલો ઉભા કર્યા છે.
સરકારી શાળાઓમાં વધુમાં વધુ વિદ્યાર્થીઓ પ્રવેશ લે, વાલીઓનો સરકારી શિક્ષણ પ્રત્યે વિશ્વાસ વધે અને પાલિકા સંચાલિત શાળાઓની છબી મજબૂત બને તે માટે આખું તંત્ર મેદાનમાં ઉતર્યું હતું. મંત્રીઓ, સાંસદો, ધારાસભ્યો, કોર્પોરેટરો, અધિકારીઓ અને શિક્ષણ સમિતિના સભ્યો અલગ-અલગ શાળાઓમાં જઈ બાળકોને આંગળી પકડીને પ્રવેશ અપાવી રહ્યા હતા. બીજી તરફ શિક્ષણ સમિતિના અધ્યક્ષે કેટલીક શાળાઓમાં હાજરી આપ્યા બાદ ગાંધીનગરથી આવેલા એક ઉચ્ચ અધિકારી સાથે સેન્ટ ઝેવિયર્સ હાઇસ્કુલ અને સેન્ટ ઝેવિયર્સ હાઇસ્કુલ અંગ્રેજી માધ્યમની શાળાના પ્રવેશોત્સવમાં હાજરી આપી હતી. આ ઘટનાએ અનેક પ્રશ્નો ઊભા કર્યા છે. જે વ્યક્તિ સમગ્ર શહેરની પાલિકા સંચાલિત શાળાઓનું નેતૃત્વ કરે છે અને સરકારી શિક્ષણને પ્રોત્સાહન આપવાની જવાબદારી ધરાવે છે, તે જ વ્યક્તિ પ્રવેશોત્સવ જેવા મહત્વપૂર્ણ અભિયાન દરમિયાન ખાનગી શાળાના કાર્યક્રમમાં હાજરી આપે તો તેનાથી કયો સંદેશ જાય છે તે અંગે શિક્ષણ વર્તુળોમાં ચર્ચા શરૂ થઈ છે. પ્રવેશોત્સવના દિવસે જ શિક્ષણ સમિતિના અધ્યક્ષ ખાનગી શાળાના મંચ પર જોવા મળતા સરકારી શિક્ષણ પ્રત્યેની પ્રતિબદ્ધતા અંગે પ્રશ્નો ઉઠવા સ્વાભાવિક છે.
ખાસ કરીને જ્યારે સ્થાયી સમિતિના અધ્યક્ષ, શિક્ષણ સમિતિના અન્ય સભ્યો, કોર્પોરેટરો અને અધિકારીઓ આખો દિવસ પાલિકા સંચાલિત શાળાઓમાં કાર્યક્રમોને સફળ બનાવવા માટે વ્યસ્ત હતા ત્યારે અધ્યક્ષની આ હાજરી વધુ ચર્ચાસ્પદ બની છે. શિક્ષકો અને શિક્ષણપ્રેમીઓમાં પણ એવી ચર્ચા ચાલી રહી છે કે સરકારી શાળાઓને વધુ મજબૂત બનાવવાના સમયે ખાનગી શાળાના કાર્યક્રમને મહત્વ આપવાની જરૂર શું હતી? આવી ચર્ચા જોરશોરમાં શરૂ થઈ ગઈ છે.
પોતાનાં શિક્ષણનું બ્રાન્ડિંગ કે ખાનગી શાળાનું પ્રદર્શન?
નગર પ્રાથમિક શિક્ષણ સમિતિના અધ્યક્ષ તરીકે રાજેન્દ્ર કાપડિયાની પ્રથમ અને મુખ્ય જવાબદારી પાલિકા સંચાલિત શાળાને પ્રોત્સાહન આપવાની, વાલીઓમાં સરકારી શિક્ષણ પ્રત્યે વિશ્વાસ વધારવાની અને સમિતિની શાળાનું પ્રતિનિધિત્વ કરવાની છે. ખાસ કરીને પ્રવેશોત્સવ જેવા મહત્વપૂર્ણ અભિયાન દરમિયાન તેમની હાજરી અને પ્રવૃત્તિ સમગ્ર તંત્ર માટે સંદેશરૂપ ગણાતી હોય છે.
પરંતુ જ્યારે સમગ્ર શિક્ષણ સમિતિ, અધિકારીઓ અને પદાધિકારીઓ સરકારી શાળાઓમાં નવા વિદ્યાર્થીઓને આવકારવા અને પ્રવેશ વધારવા માટે દોડધામ કરી રહ્યા હતા, ત્યારે અધ્યક્ષ ખાનગી અંગ્રેજી માધ્યમની શાળાના કાર્યક્રમમાં જોવા મળતા અનેક સવાલો ઉભા થયા છે. સરકારી શાળામાં પ્રવેશ વધારવાના અભિયાન દરમિયાન ખાનગી શાળાના મંચ પર તેમની હાજરીથી શિક્ષણ ક્ષેત્રે ચર્ચા શરૂ થઈ છે કે આખરે શિક્ષણ સમિતિના સર્વોચ્ચ પદાધિકારી કયો સંદેશ આપવા માંગતા હતા? પ્રવેશોત્સવના દિવસે સરકારી શાળાઓ કરતાં ખાનગી શાળાના કાર્યક્રમમાં હાજરી આપવાનો નિર્ણય આજે શિક્ષણ વર્તુળોમાં ચર્ચાનો વિષય બન્યો છે.
