Ahmedabad Accident: અમદાવાદના નારણપુરા વિસ્તારમાં લાડલી ચાર રસ્તા નજીક ગત મોડી રાત્રે એક ગંભીર માર્ગ અકસ્માત સર્જાયો હતો, જેમાં એક યુવકનું કરૂણ મોત નિપજ્યું છે. મૃતક યુવકની ઓળખ 20 વર્ષીય વેદાંત મોદી તરીકે થઈ છે, જે થલતેજ વિસ્તારની નિકિતા પાર્ક સોસાયટીમાં રહેતો હતો.
આ પણ વાંચોઃ દાંતાના પાડલીયા ગામે પોલીસ અને ફોરેસ્ટ અધિકારીની ટીમ પર પથ્થર અને તીર કામઠાંથી હુમલો, 45થી વધુ જવાન ઘાયલ
બેફામ CNG ગાડીએ લીધો જીવ
મળતી માહિતી મુજબ, શનિવારે (13 ડિસેમ્બર) વેદાંત મોદી પોતાનું એક્ટિવા (નંબર: GJ 01 UA 5863) લઈને પોતાના ઘર તરફ જઈ રહ્યો હતો. આ દરમિયાન, રાત્રે આશરે દસ વાગ્યાના આસપાસ લાડલી શોરૂમ સામે આવેલા ત્રણ રસ્તાથી લગભગ 50 મીટર આગળ પહોંચતા, અદાણી CNG ગાસ્કેટ ગાડીના ચાલકે પૂરપાટ ઝડપે, બેદરકારીથી વાહન ચલાવીને વેદાંતના એક્ટિવા સાથે ભયંકર ટક્કર મારી હતી. આ અકસ્માત એટલો ગંભીર હતો કે એક્ટિવા ચાલક વેદાંત મોદીને માથાના ભાગે ગંભીર ઈજાઓ થઈ હતી, જેના કારણે તેમનું ઘટનાસ્થળે જ કરૂણ મોત નીપજ્યું હતું.
આ પણ વાંચોઃ તળાજાની ડેરીનું મિક્સ મિલ્ક તેમજ ટીપોર્ટનું વેજીટેબલ ફેટ સ્પ્રેડ સબસ્ટાન્ડર્ડ સાબિત
પોલીસ કાર્યવાહી શરૂ
સ્થાનિકો દ્વારા આ ઘટનાની જાણ પોલીસને કરવામાં આવતાં પોલીસ કાફલો તાત્કાલિક સ્થળ પર પહોંચી ગયો હતો. હાલમાં પોલીસે અકસ્માત સર્જનાર CNG ગાડીના ચાલક વિરુદ્ધ કાયદાકીય કાર્યવાહી શરૂ કરી છે અને અકસ્માત કયા સંજોગોમાં થયો તેની વધુ તપાસ હાથ ધરી છે. આ ગમખ્વાર અકસ્માતથી થલતેજ અને નારણપુરા વિસ્તારમાં શોકની લાગણી ફેલાઈ છે.
