Ahmedabad Rural Robbery Case: અમદાવાદ ગ્રામ્યના ધોળકા તાલુકાના કોઠ ગામમાં થોડા દિવસો પહેલા થયેલી લૂંટની ઘટનાનો ભેદ ઉકેલવામાં પોલીસને મોટી સફળતા મળી છે. મંકી કેપ પહેરીને ઘરમાં ઘૂસી, દંપતીને છરીની અણીએ બંધક બનાવી લાખોની લૂંટ ચલાવનારી ગેંગના ત્રણ સાગરીતોને પોલીસે દબોચી લીધા છે, જ્યારે આ ગુનામાં સંડોવાયેલા અન્ય ચાર આરોપીઓ હજુ પણ ફરાર છે.
મધરાત્રે મંકી કેપ પહેરી ઘરમાં ઘૂસ્યા
મળતી માહિતી અનુસાર, કોઠ ગામમાં રહેતા અને ખેતી તેમજ કરિયાણાની દુકાન ચલાવતા સંજયસિંહ રાઠોડના ઘરમાં ગત 13મી-14મી જૂનની મધરાત્રે આ લૂંટારૂ ગેંગ ત્રાટકી હતી. ચારથી વધુ લૂંટારૂઓએ મોઢે મંકી કેપ બાંધેલી હતી. ઘરમાં ઘૂસીને આ શખસોએ સંજયસિંહ અને તેમના પત્નીને છરી બતાવી બંધક બનાવી લીધા હતા. લૂંટ દરમિયાન દંપતીએ પ્રતિકાર કરવાનો પ્રયાસ કરતા ઉશ્કેરાયેલા લૂંટારૂઓએ તેમના પર છરી વડે હુમલો કરી ઈજાઓ પહોંચાડી હતી. લૂંટારુઓ ઘરમાંથી સોના-ચાંદીના દાગીના, રોકડ રકમ અને મોબાઈલ ફોન સહિત કુલ અંદાજે રૂપિયા 2,10,000 રૂપિયાની મત્તા લૂંટીને અંધારામાં ફરાર થઈ ગયા હતા.
આ પણ વાંચો: અમદાવાદ: રિવરફ્રન્ટ પર જોખમી સ્ટંટ કરતા શખસોનો વીડિયો વાઈરલ, સીટ પર ઊંધા સૂઈને બાઈક હંકારી, પોલીસ તપાસ શરૂ
CCTV અને ટેકનિકલ સર્વેલન્સના આધારે 3 આરોપીની ધરપકડ
લૂંટની ઘટનાને પગલે કોઠ પોલીસ તુરંત એક્શનમાં આવી હતી. પોલીસે ઘટનાસ્થળની આસપાસના સીસીટીવી (CCTV) ફૂટેજ, ટેકનિકલ સર્વેલન્સ અને સ્થાનિક બાતમીદારોના નેટવર્કનો ઉપયોગ કરીને તપાસના ચક્રો ગતિમાન કર્યા હતા. પોલીસે સીસીટીવી, ટેકનિકલ સર્વેલન્સ અને બાતમીના આધારે ત્રણ આરોપી જયેન્દ્ર મકવાણા, હાર્દિક મકવાણા અને જગમાલ મકવાણાની ધરપકડ કરી છે.
ફરાર 4 આરોપીઓને પકડવા ચક્રો ગતિમાન કર્યા
કોઠ પોલીસે પકડાયેલા ત્રણેય આરોપીઓની આકરી પૂછપરછ કરીને તેમની પાસેથી લૂંટમાં ગયેલા ત્રણ મોબાઈલ ફોન અને 3500 રૂપિયાની રોકડ રકમ રિકવર કરી લીધી છે. પોલીસની પ્રાથમિક તપાસમાં સામે આવ્યું છે કે આ ગુનામાં અન્ય ચાર આરોપીઓ પણ સંડોવાયેલા છે, જેઓ હાલ પોલીસ પકડથી દૂર છે.
હાલમાં કોઠ પોલીસે પકડાયેલા આરોપીઓના ગિરાફ મેળવી વધુ તપાસ હાથ ધરી છે, તેમજ ફરાર થઈ ગયેલા અન્ય ચાર આરોપીઓને ઝડપી પાડવા માટે અલગ-અલગ દિશામાં તપાસ તેજ કરી છે. ગામમાં બનેલી આ ઘટના બાદ આરોપીઓ પકડાતા સ્થાનિક રહીશોએ રાહતનો શ્વાસ લીધો છે.
