Ahmedabad Dholka Crime News: અમદાવાદ જિલ્લાના ધોળકાથી ચોંકાવનારી ઘટના સામે આવી હતી. ધોળકાના દરબાર જીન વિસ્તારમાં માત્ર પૈસાની માથાકૂટમાં એક મિત્રએ જ પોતાના મિત્રનું ગળું કાપીને ઘાતકી હત્યા કરી નાખી હતી. 33 વર્ષીય મૃતકની મૃતદેહ લોહીલુહાણ હાલતમાં ઓરડીમાંથી મળી આવતા સમગ્ર પંથકમાં ચકચાર મચી ગઈ હતી.
પૈસાના હિસાબ બાબતે થઈ હતી ઉગ્ર બોલાચાલી
મળતી માહિતી અનુસાર, મૃતક રાજલાલ અને તેનો મિત્ર રોશનકુમાર શાહ બંને બિહારથી સાથે કમાવવા માટે આવ્યા હતા અને અહીં એક જ ઓરડીમાં રહેતા હતા. ઘટનાના દિવસે બંને મિત્રો વચ્ચે પૈસાની લેવડ-દેવડ અને હિસાબ બાબતે ઉગ્ર બોલાચાલી થઈ હતી. આ બોલાચાલી દરમિયાન મામલો એટલો બિચક્યો હતો કે ઉશ્કેરાઈ ગયેલા રોશનકુમાર શાહે તીક્ષ્ણ છરી વડે રાજલાલ પર હુમલો કરી તેનું ગળું કાપી નાખ્યું હતું અને તેને મોતને ઘાટ ઉતારી દીધો હતો.
પોલીસે 6 અલગ-અલગ ટીમો બનાવી હત્યારાને ઝડપ્યો
ઘટનાની ગંભીરતાને જોતા ધોળકા ટાઉન પોલીસ તાત્કાલિક એક્શન મોડમાં આવી ગઈ હતી. પી.આઈ. એ.આર. ધવનના માર્ગદર્શન હેઠળ પોલીસની 6 અલગ-અલગ ટીમો બનાવવામાં આવી હતી. પોલીસે ઘટનાસ્થળની આસપાસના CCTV ફૂટેજ અને ટેકનિકલ સોર્સનો સઘન ઉપયોગ કરીને તપાસનો ધમધમાટ શરૂ કર્યો હતો.
પોલીસે ગણતરીના કલાકોમાં જ હત્યારા રોશનકુમાર શાહને ઝડપી પાડી, તેની ધરપકડ કરીને જેલના સળિયા પાછળ ધકેલી દીધો છે અને આગળની કાયદેસરની કાર્યવાહી હાથ ધરી છે.
