Ahmedabad News: અમદાવાદના પોશ ગણાતા નવરંગપુરા વિસ્તારમાં રહેતી અને એક ખાનગી હોસ્પિટલમાં નર્સ તરીકે ફરજ બજાવતી 21 વર્ષીય યુવતી સાયબર ક્રાઈમ અને માનસિક પજવણીનો ભોગ બની છે. એક માથાભારે અજાણ્યા શખસે સોશિયલ મીડિયા પ્લેટફોર્મ ઈન્સ્ટાગ્રામ પર આ યુવતીના નામ અને ફોટાનો દુરુપયોગ કરીને એક-બે નહીં, પરંતુ ૫થી વધુ ફેક એકાઉન્ટ (ફેક આઈડી) બનાવી તેને સોશિયલ મીડિયા પર બદનામ કરવાનો હીન પ્રયાસ કર્યો હતો. આ અંગે ભોગ બનનાર યુવતીએ અંતે કંટાળીને નવરંગપુરા પોલીસ મથકમાં ફરિયાદ નોંધાવી છે.
રીલ પર ખોટી કોમેન્ટ્સ કરવા બાબતે ટોકતા જ પજવણી શરૂ થઈ
પોલીસ ફરિયાદની વિગતો મુજબ, નવરંગપુરામાં રહેતી આ યુવતીએ થોડા દિવસો પહેલાં પોતાના મૂળ ઇન્સ્ટાગ્રામ એકાઉન્ટ પર એક મોટિવેશનલ પોસ્ટ અને રીલ શેર કરી હતી. આ પોસ્ટ પર કોઈ અજાણ્યા શખસે એકસાથે અંદાજે 15 જેટલી અણછાજતી અને ખોટી કોમેન્ટ્સ કરી હતી. યુવતીએ કંટાળીને આ તમામ કોમેન્ટ્સ ડિલીટ કરી નાખી હતી અને સાયબર ક્રાઈમમાં પોલીસ કાર્યવાહી કરવાની ચીમકી આપી હતી, જેને પગલે એ સમયે આરોપીએ પોતાનું આઈડી બંધ કરી દીધું હતું. જોકે, આ અદાવત રાખીને બીજા જ દિવસથી રોમિયોએ પજવણીનું નવું નેટવર્ક શરૂ કર્યું હતું.
ગામના યુવકનો ફોટો મૂકી લખતો ‘My Love’, સ્ટોરી જોઈને આઈડી બંધ કરી દેતો
આરોપીએ યુવતીના જ ફોટા અને નામનો ઉપયોગ કરીને ૫થી વધુ અલગ-અલગ ફેક આઈડી બનાવી દીધા હતા અને તેના પરથી યુવતીને જ ફ્રેન્ડ રિક્વેસ્ટ મોકલવા લાગ્યો હતો. આટલેથી ન અટકતા, આરોપીએ આ ફેક એકાઉન્ટ્સની ઇન્સ્ટા સ્ટોરીમાં યુવતીના વતન ગામના એક યુવકનો ફોટો મૂકીને તેના પર ‘MY LOVE’ એવું લખાણ લખીને વાઈરલ કર્યું હતું. આરોપી એટલી ચાલાકી વાપરતો હતો કે યુવતી પોતાના અસલી આઈડી પરથી જેવી આ ફેક સ્ટોરી જુએ કે તરત જ તે ફેક એકાઉન્ટને તુરંત ડીએક્ટિવેટ (બંધ) કરી દેતો હતો જેથી કોઈ પુરાવો ન રહે.
ગંદી ભાષામાં મેસેજ કરતા અંતે નર્સ પહોંચી પોલીસ સ્ટેશને
આ ફેક આઈડીના માધ્યમથી અજાણ્યા શખસે યુવતીના ઇનબોક્સમાં આવીને અત્યંત ગંદી, અશ્લીલ અને અભદ્ર ભાષામાં વાતચીત કરવાનો અને માનસિક ટોર્ચર કરવાનો પ્રયાસ પણ કર્યો હતો. આ સતત ચાલતા માનસિક ત્રાસ અને બદનામીના ડરથી કંટાળીને અંતે નર્સ યુવતીએ નવરંગપુરા પોલીસ સ્ટેશનનો સંપર્ક સાધ્યો હતો અને અજાણ્યા ઈસમ સામે આઈટી એક્ટ અંતર્ગત ગુનો દાખલ કરાવ્યો હતો.
હાલમાં નવરંગપુરા પોલીસે આ મામલાને ગંભીરતાથી લઈને આ ફેક એકાઉન્ટ્સ કયા મોબાઈલ અને કયા આઈપી (IP) એડ્રેસ પરથી બનાવવામાં આવ્યા છે તેની વિગતો મેળવવા ટેકનિકલ એનાલિસિસ અને સાયબર સેલની મદદથી તપાસના ચક્રો ગતિમાન કર્યા છે.
