India New Plan For Export: અમેરિકન ટેરિફને કારણે ટેક્સટાઇલ સેક્ટર(કાપડ ક્ષેત્રે) સૌપ્રથમ અને સૌથી મોટું સંકટ તોળાઈ રહ્યું છે, કારણ કે અમેરિકન રાષ્ટ્રપ્રમુખ ડોનાલ્ડ ટ્રમ્પે ભારત પર કુલ 50 ટકા ટેરિફ લાદ્યો છે, જેમાંથી 25 ટકા પેનલ્ટી તરીકે છે. ભારતે અમેરિકાના આ નિર્ણયને એકતરફી અને અયોગ્ય ગણાવ્યો છે. આ સાથે ભારતે અન્ય વિકલ્પો પર પણ વિચાર કરવાનું શરૂ કર્યું છે, જેથી ટેરિફની અસર ઘટાડી શકાય.
વાસ્તવમાં ભારતમાં મોટી સંખ્યામાં લોકો ટેક્સટાઇલ સેક્ટર સાથે સંકળાયેલા છે, જેના કારણે લાખો લોકોની નોકરીઓ જોખમમાં છે, કારણ કે ટેરિફને કારણે અમેરિકામાંથી કપડાંની માગ ઘટવાની છે. જો ઓર્ડરમાં ઘટાડો થશે, તો તેની અસર ઉત્પાદન પર જોવા મળશે, જેની સીધી અસર રોજગાર પર પડશે. તેથી, હવે ભારત સરકાર અમેરિકન બજારના વિકલ્પ તરીકે લગભગ 40 અન્ય બજારો એટલે કે અન્ય દેશોમાં કપડા નિકાસ કરવાનું વિચારી રહી છે.
સમાચાર એજન્સી પીટીઆઈએ બુધવારે જણાવ્યું હતું કે, ભારતે તેની કાપડ નિકાસ વધારવાની અને બ્રિટન, જાપાન અને દક્ષિણ કોરિયા સહિત 40 મુખ્ય બજારોમાં પ્રવેશ કરવાની યોજના બનાવી છે જેથી યુનાઇટેડ સ્ટેટ્સ દ્વારા લાદવામાં આવેલી 50 ટકા દંડાત્મક આયાત ડ્યુટીની અસર ઓછી થાય.
આ પણ વાંચો: ટ્રમ્પનું બેવડું વલણ: ભારત પર ટેરિફ ઝીંકી ખુદ અમેરિકાની રશિયા સાથે સોદાબાજી
$590 બિલિયનનું છે બજાર
નવા 40 દેશોમાં વિસ્તરણનો હેતુ પરંપરાગત અને ઉભરતા બજારોમાં તેની હાજરી વધારવાનો છે. આ દેશોની કુલ મળીને કાપડ અને વસ્ત્રોની આયાત $590 બિલિયન(અરબ)ની છે, જે ભારતીય નિકાસકારો માટે ઘણી તકો દર્શાવે છે. હાલમાં, આ બજારમાં ભારતનો હિસ્સો ફક્ત 5-6 ટકા છે.
$48 બિલિયનથી વધુનું નુકસાન
આ રણનીતિ એવા સમયે આવી છે જ્યારે ભારતીય નિકાસકારો ભારે નુકસાનનો ભય અનુભવી રહ્યા છે. સરકાર માને છે કે 27 ઓગસ્ટથી લાગુ કરાયેલ 50% અમેરિકન ટેરિફ તેમના વેપારમાં $48 બિલિયનથી વધુનું નુકસાન કરી શકે છે. એપેરલ એક્સપોર્ટ પ્રમોશન કાઉન્સિલ (AEPC) ના સેક્રેટરી જનરલ મિથિલેશ્વર ઠાકુરના જણાવ્યા અનુસાર, કાપડ ક્ષેત્ર સૌથી વધુ પ્રભાવિત થયું છે. આ તે ક્ષેત્ર છે જેણે નાણાકીય વર્ષ 2024-25 માં અમેરિકામાં $10.3 બિલિયનના માલની નિકાસ કરી હતી.
ભારતનું કાપડ ક્ષેત્ર અમેરિકન બજારમાંથી થયું બહાર?
ઠાકુરે વધુમાં કહ્યું કે અમેરિકાનો 25 ટકા ટેરિફ પૂરતો હતો, પરંતુ હવે વધારાના 25 ટકા ટેરિફના અમલીકરણને કારણે, ભારતીય કાપડ ઉદ્યોગ અમેરિકન બજારમાંથી સંપૂર્ણપણે બહાર થઈ ગયો છે.
નોંધનીય છે કે 2024-25 માં ભારતના આ ક્ષેત્રનું કદ $179 બિલિયન હોવાનો અંદાજ છે, જે $37 બિલિયનની નિકાસ પર આધારિત છે. કુલ વૈશ્વિક કાપડ આયાત બજાર $800 બિલિયનથી વધુ હોવા છતાં, ભારતનો હિસ્સો ફક્ત 4.1 ટકા છે, જે વૈશ્વિક સ્તરે છઠ્ઠા સ્થાને છે.
