પરવાનગી વગર વાણિજ્ય હેતુસર ઉપયોગ કરાતો હતો
સંચાલક બીયુ, ફાયર એનઓસી સંદર્ભેના જરૂરી પૂરાવા રજૂ નહીં કરી શકતા પાર્ટી પ્લોટ અગાઉ સીલ કરાયો હતો
આણંદ: આણંદના સરદાર પટેલ રોડ પર સરકારી કપાતની જગ્યા ઉપર ગેરકાયદે બાંધકામ બદલ જે.કે. લોટસ પાર્ટી પ્લોટના સંચાલકને નોટિસ આપી બાંધકામ તોડી પાડવા આદેશ કર્યો છે. કરમસદ આણંદ મહાનગરપાલિકાના ટાઉન પ્લાનિંગ એસ્ટેટ વિભાગ દ્વારા મનપા વિસ્તારમાં સરદાર પટેલ રાજમાર્ગ ઉપર આવેલા જે. કે. લોટસ પાર્ટી પ્લોટના સંચાલક પાસે તેમની મિલકત સંબંધિત પુરાવા, પરવાનગી રજૂ કરવા નોટિસ આપી જાણ કરાઈ હતી. જે. કે. પાર્ટી પ્લોટના સંચાલકને અગાઉ વાણિજ્ય હેતુની બાંધકામ પરવાનગી, બાંધકામ વપરાશ પરવાનગી(બીયુ) અને ફાયર એન.ઓ.સી. રજૂ કરવા બાબતે નોટિસ આપવામાં આવી હતી, પરંતુ પાર્ટી પ્લોટના સંચાલક યોગ્ય પુરાવા રજૂ કરી શક્યા ન હતા. જેથી તાત્કાલિક અસરથી આ પાર્ટી પ્લોટ શીલ કરવામાં આવ્યો હતો.
સક્ષમ સત્તાધિકારી પાસેથી કાયદા હેઠળની વિવિધ પરવાનગીઓ મેળવ્યા વગર સરકારી કપાત જગ્યા ઉપર ગેરકાયદે પાર્ટી પ્લોટનો બાંધકામ કરી વાણિજ્ય હેતુસર ઉપયોગ કરવામાં આવતો હતો.
ઉપરાંત જે. કે. પાર્ટી પ્લોટ સરકારી કપાતની જગ્યા ઉપર ગેરકાયદે રીતે અનઅધિકૃત રીતે કાયદાની વિરુદ્ધ બાંધકામ કરતા તેને ગુજરાત પ્રોવિન્સીયલ મ્યુનિસિપલ કોર્પોરેશન એક્ટ ૧૯૪૯ની કલમ ૨૬૦ મુજબ તોડી પાડવા માટે (ડિમોલેશન નોટિસ) કરમસદ આણંદ મહાનગરપાલિકાના એસ્ટેટ ઇન્સ્પેક્ટર દ્વારા નોટિસ આપવામાં આવી છે.
