Aadhar Mobile Number Update: આધાર કાર્ડમાં મોબાઇલ નંબર ચેન્જ કરવાનું હવે સહેલું થઈ રહ્યું છે. અત્યાર સુધી આ નંબર બદલાવવા માટે સેન્ટર પર જવું પડતું હતું. જોકે હવે યુઝર્સ તેમની આધાર એપ્લિકેશન પરથી જ એને બદલી શકશે. આ માટે ધ યુનિક આઇડેન્ટિફિકેશન ઓથોરિટી ઓફ ઈન્ડિયા (UIDAI) દ્વારા જાહેરાત કરવામાં આવી છે કે તેઓ હવે આધાર સર્વિસમાં બદલાવ કરવા જઈ રહ્યાં છે. આ બદલાવમાં હવે યુઝર્સ તેમના મોબાઇલ નંબરને ઑનલાઇન બદલી શકશે. નંબર બદલવા માટે પણ યુઝર્સે ઘણી લાઇનમાં ઊભા રહેવું પડતું હતું અને એ માટે સમય નીકળી જતો હતો. જોકે હવે આ પ્રોસેસને ખૂબ જ સરળ અને ઝડપી બનાવવામાં આવી રહી છે.
કેવી રીતે કરવામાં આવશે અપડેટ?
આ માટે યુઝરે માય આધાર એપ્લિકેશન પર જઈને પ્રોસેસ શરૂ કરવાની રહેશે. યુઝર જ્યારે નંબર બદલશે ત્યારે નવા નંબર પર એક OTP આવશે. આ OTP દ્વારા ઓથેન્ટિકેશન કર્યા બાદ ફેસ ઓથેન્ટિકેશન કરવું પડશે. આ માટે UIDAI દ્વારા મોબાઇલના સેલ્ફી કેમેરાનો ઉપયોગ કરવાનું નક્કી કરવામાં આવ્યું છે. એ વેરિફિકેશન થયા બાદ યુઝરનો મોબાઇલ નંબર બદલાઈ જશે. આથી તેમને આધાર કેન્દ્રમાં જવાની જરૂર નહીં રહે. ઘરે બેઠા-બેઠા પણ હવે આ બદલાવ કરી શકાશે. આ અપડેટને આધાર એપ્લિકેશનમાં રજૂ કરવામાં આવશે. આ અપડેટ ક્યારે આપવામાં આવશે એ વિશે જાહેરાત કરવામાં નથી આવી, પરંતુ આ ફીચરને બહુ જલદી એન્ડ્રોઇડ અને એપલમાં આપવામાં આવશે.
લોકોને થશે ફાયદો
આ માટે યુઝરે હવે કામ છોડીને અથવા તો ઓફિસમાંથી રજા પાડીને લાંબી લાઇનમાં ઊભા રહેવાની જરૂર નહીં પડે. આ ફીચર યુઝરની સુવિધાને ધ્યાનમાં રાખીને બનાવવામાં આવ્યું છે. આ ફીચર ખાસ કરીને વૃદ્ધો, ગામડાઓ અને જ્યાં આધાર કેન્દ્ર ન હોય એવી જગ્યા માટે ખૂબ જ મદદરૂપ સાબિત થશે. આ પ્રોસેસ માટે આધાર કેન્દ્રમાં કલાકો નીકળી જતાં હતાં એ હવે ફક્ત થોડી મિનિટમાં પૂરું થઈ જશે. આ એપ્લિકેશનની મદદથી હવે પેપર પર કામ ઓછું થશે અને ડિજિટલ વધુ જોવા મળશે.
આ પણ વાંચો: ગૂગલ મેપ્સનો નવો પાવર સેવિંગ મોડ: લાંબા પ્રવાસમાં કલાકો ચાલે એટલી મોબાઇલ બેટરી બચશે
સિક્યોરિટીને પ્રાધાન્ય
ભારત હવે ડિજિટલ તરફ વધી રહ્યું છે ત્યારે આધારને વધુ સેફ અને સિક્યોર બનાવવું જરૂરી છે. આથી જ મોબાઇલ નંબરના બદલાવ માટે પણ સિક્યોરિટીને ધ્યાનમાં રાખીને OTP અને બાયોમેટ્રિક વેરિફિકેશનનો ઉપયોગ કરવામાં આવ્યો છે. આ સાથે જ ભવિષ્યમાં પણ એમાં ઘણાં બદલાવની સાથે એને વધુ સિક્યોર બનાવવાની કોશિશ કરવામાં આવશે.
