નવી દિલ્હી,૨૫ નવેમ્બર,૨૦૨૫,મંગળવાર
દિલ્હીમાં ઠંડી અને પ્રદૂષણનો બેવડો માર શરુ થયો છે. પ્રદૂષણના લીધે દિલ્હી નિવાસીઓએ શ્વાસ લેવામાં પણ તકલીફ પડી રહી છે. તાજેતરમાં ઇથિઓપિયામાં ૧૦ હજાર વર્ષ પછી હેલી ગુબ્બી નામનો જવાળામુખી વિસ્ફોટ થયો છે. વિસ્ફોટ એટલો ભયાનક હતો કે ૧૫ કિમી સુધી ઉંચે આકાશમાં રાખનો ગુબ્બારો થયો હતો. આ જવાળામુખીની અસર હેઠળ ૪ હજાર કિમી દૂર દિલ્હીના વાતાવરણ પર પડી શકે છે એવું માનવામાં આવતો હતું.
જો કે મૌસમ વિભાગે જણાવ્યું છે ઇથિઓપિયાની પ્રાકૃતિક ઘટનાના લીધે રાખના ગુબ્બારાની દિલ્હી-એનસીઆરના વિસ્તારો પર વિપરિત અસર થશે નહી.બુધવારે દિલ્હી-એનસીઆરના શહેરો પર સવારે હળવું ધૃમ્મસ જોવા મળશે. પહેલા ચિંતાની વાત એ હતી કે ઇથિઓપિયાના હેલી ગુબ્બી જવાળામુખીથી નિકળતો રાખનો જથ્થો જેટ સ્ટ્રીમની સાથે ભારત તરફ આગળ વધી રહયો હતો. સોમવારની રાત્રે દેશના ઉત્તર પશ્ચિમ ભાગોમાં ફેલાયો હતો. આથી દેશના અનેક શહેરોમાં ફલાઇટ ઓપરેશનમાં અવરોધ ઉભો થયો હતો.
દિલ્હી એરપોર્ટમાં પણ લગભગ ૭ આંતરરાષ્ટ્રીય ઉડાણ રદ્દ કરવાની ફરજ પડી હતી. ૧૦ થી વધુ વિદેશી ફલાઇટ્સના ઉડાણના સમય ફેરફાર કરવાની ફરજ પડી હતી. રાખનો ગુબ્બારો ગુજરાત, રાજસ્થાન, પંજાબ અને હરિયાણા પરથી પસાર થયો હતો.આ મુસિબત દિલ્હી અને એનસીઆર પરથી ટળી ગઇ હતી. હવે આ રાખનો ગુબ્બાર ચીન તરફ આગળ વધી રહયો છે.
મૌસમ વિભાગની માહિતી અનુસાર સોમવારે ૧૧ વાગે રાત્રે જવાળામુખીના રાખ ભારત તરફ આવી હતી જેના પગલે હળવો ધુમાડો દેખાતો હતો. મંગળવારે સાંજે ૭.૩૦ વાગ્યા આસપાસ ભારત પરથી સંકટ ટળીને આગળ નીકળી જશે એવો વરતારો વ્યકત કરવામાં આવ્યો હતો.રાહતની વાત એ હતી કે ઇથિઓપિયાના જવાળામુખીની નવી દિલ્હીની વાયુ ગુણવત્તા પર ખાસ કોઇ અસર જોવા મળી નથી.
