India LPG, Petrol-Diesel Sales Report : આમ તો મધ્ય-પૂર્વમાં ચાલી રહેલા સંકટના કારણે મોટાભાગનો ક્રૂડ ઓઈલનો સપ્લાય અટકી ગયા બાદ દેશમાં ઊર્જા બચાવો ઝુંબેશ ચાલી રહી છે. દેશની અનેક સરકારી સંસ્થાઓ, નેતાઓ અને પ્રાઈવેટ સેક્ટરો ઊર્જાનો ઉપયોગ કરવાના રસ્તાઓ અપનાવી રહ્યા છે. જોકે હવે દેશમાં LPG અને પેટ્રોલ-ડીઝલને લઈને આશ્ચર્યજનક આંકડા સામે આવ્યા છે. રિપોર્ટ મુજબ, મે મહિનામાં એલપીજી વેચાણમાં મોટો ઘટાડો થયો છે, તો પેટ્રોલ-ડીઝલની માંગમાં વધારો થયો છે. સૌથી ચોંકાવનારા વાત એ છે કે, પેટ્રોલની તુલનાએ ડીઝલની વેચાણ વધુ થયું છે.
દેશના 90% પેટ્રોલ-ડીઝલ માર્કેટ પર 3 સરકારી કંપનીનો દબદબો
સરકારી તેલ કંપનીઓ ઈન્ડિયન ઓઈલ (IOC), ભારત પેટ્રોલિયમ (BPCL), અને હિન્દુસ્તાન પેટ્રોલિયમનાં આંકડા મુજબ, વાર્ષિક આધારે મે મહિનામાં પેટ્રોલના વેચાણમાં 4.8 ટકા જ્યારે ડીઝલના વેચાણમાં 6.4 ટકા વધારો થયો છે. આ ઉપરાંત વિમાનોમાં વપરાતા ATF (એવિએશન ટરબાઈન ફ્યૂલ)ના વેચાણમાં પણ 1.8 ટકાનો વધારો થયો છે. મીડિયા રિપોર્ટ મુજબ, દેશનું 90% પેટ્રોલ-ડીઝલ માર્કેટ આ જ 3 સરકારી કંપનીના હાથમાં છે.
આ પણ વાંચો : જૂના વાહનોના સ્થાને નવા વાહનો ખરીદવાની યોજના સહિત રૂ.39,290 કરોડના અનેક પ્રોજેક્ટોને મંજૂરી
LPGના વેચાણમાં ધરખમ ઘટાડો
સૌથી મહત્ત્વની વાત એ છે કે, એલપીજીના વેચાણમાં 24 ટકાનો ધરખમ ઘટાડો થયો છે. એપ્રિલ-2026માં તેનું વેચાણ 16 ટકા ગગડી ગયું હતું, તે પછી મે મહિનામાં પણ તેના વેચાણમાં ધરખમ ઘટાડો થયો છે. નિષ્ણાતોના મતે, આના પાછળ અનેક કારણો જવાબદાર હોઈ શકે છે. સિલિન્ડરની વધી ગયેલી કિંમતો અને ઉપયોગને ધ્યાને રાખીને કેટલાક સેક્ટરોએ તેની ખરીદી ઘટાડી દીધી હોઈ શકે છે. આ ઉપરાંત ગત વર્ષના મુકાબલે માંગનો આધાર વધવાના કારણે પણ ટકાવારી વધુ દેખાઈ રહી હોઈ શકે છે.
દેશની આર્થિક પ્રવૃત્તિઓ મજબૂત થવાના સંકેત
બીજીતરફ સારી વાત એ પણ કહી શકાય કે, પેટ્રોલ-ડીઝલનું વધતુ વેચાણ દેખાડી રહી છે કે, આર્થિક પ્રવૃત્તિઓ મજબૂત થઈ રહી છે. ગરમીની સિઝનમાં ટ્રાન્સપોર્ટ, લોજિસ્ટિકમાં પેટ્રોલનો વપરાશ વધુ થયો છે. ટુ-વ્હિલર્સ વાહનોમાં પણ પેટ્રોલનો ઉપયોગ વધ્યો છે. જ્યારે ડીઝલની વધતી માંગે નિષ્ણાતોને ચોંકાવી દીધા છે. સામાન્ય રીતે ભારતમાં પેટ્રોલથી અઢી ગણું વધુ ડીઝલનું વેચાણ થાય છે, તેથી મે મહિનામાં ડીઝલના વેચાણમાં વધારો થવાનો આંકડો ચોંકાવનારો છે.
આ પણ વાંચો : ઈન્દિરા ગાંધીએ 1968માં રોપેલા બીજ હવે બનશે ‘વટવૃક્ષ’! સંકટ વચ્ચે પણ ઓઈલ આપશે આ દેશ
