(પીટીઆઇ) પટણા,
તા. ૧૧
બિહારમાં બીજા અને અંતિમ તબક્કાની ચૂંટણીમાં ૧૨૨ વિધાનસભા
બેઠકો પર આજે વિક્રમજનક ૬૯ ટકા મતદાન થયું હતું. આ સાથે જ એક મહિનાથી ચાલી રહેલી
ચૂંટણી કવાયતનો અંત આવ્યો છે.
બીજા અને અંતિમ તબક્કાની ચૂંટણી પૂર્ણ થતાં જ આજે એક્ઝિટ
પોલનાં તારણો જાહેર કરવામાં આવ્યા હતાં. મોટા ભાગનાં એક્ઝિટ પોલમાં એનડીએને બમ્પર
બહુમતી મળવાનો દાવો કરવામાં આવ્યો છે.
૬ નવેમ્બરે પ્રથમ તબક્કાની ચૂંટણીમાં ૧૨૧ વિધાનસભા બેઠકો પર
૬૫.૦૯ ટકા મતદાન થયું છે. ૧૪ નવેમ્બરે મત ગણતરી કરવામાં આવશે. ૧૪ નવેમ્બરે બપોર
સુધીમાં એ નક્કી થઇ જશે કે રાજ્યમાં કોની સરકાર રચાશે અને કોણ મુખ્યપ્રધાન બનશે.
પત્રકાર પરિષદને સંબોધતા બિહારના મુખ્ય ચૂંટણી અધિકારી
વિનોદ સિંહ ગુંજિયાલે જણાવ્યું હતું કે વિધાનસભા ચૂંટણીનાં બીજા અને અંતિમ
તબક્કાની ચૂંટણીમાં ૬૮.૭૯ ટકા મતદાન થયું છે.
તેમણે વધુમાં જણાવ્યું હતું કે જો બંને તબક્કાની ચૂંટણીમાં
કુલ ૬૬.૯૦ ટકા મતદાન થયું છે. જે છેલ્લી વિધાનસભા ચૂંટણી કરતા ૯.૬ ટકા વધારે છે.
૨૦૨૦ની વિધાનસભા ચૂંટણીમાં ૫૭.૨૯ ટકા મતદાન થયું હતું.
મતદાનની ઉંચી ટકાવારીને કારણે એનડીએ અને ઇન્ડિયા ગઠબંધન
બંને ઉત્સાહમાં છે. રાજદ પ્રમુખ તેજસ્વી યાદવે જણાવ્યું હતું કે એનડીએનાં શાસનથી ત્રાસીને
મતદારોએ મોટી સંખ્યામાં મતદાન કર્યુ છે. બીજી ધર્મેન્દ્ર પ્રધાને જણાવ્યું હતું કે
મતદાનની ઉંચી ટકાવારીનો અર્થ હમેશા સત્તા વિરોધી લહેર થતો નથી.
એક વર્ષ પહેલા જન સુરાજ પાર્ટીની રચના કરનારા પ્રશાંત
કિશોરે જણાવ્યું હતું કે તેમની એક વર્ષ જૂની પાર્ટી આ વખતની ચૂંટણીમાં પોતાની અસર
દેખાડશે. તેમણે શિક્ષણ અને રોજગારીનું વચન આપ્યું હતું.
બીજા તબક્કાની ચૂંટણી કોંગ્રેસ માટે મહત્ત્વપૂર્ણ હતી
કારણકે ૨૦૨૦ની ચૂંટણીમાં કોંગ્રેસને મળેલી ૧૯ બેઠકોમાંથી ૧૨ બેઠકો પર આ તબક્કામાં
મતદાન થયું છે.
આજે જાહેર કરવામાં એક્ઝિટ પોલમાં પ્રશાંત કિશોરનાં નવા પક્ષ
જન સુરાજ પાર્ટીનો નિરાશાજનક દેખાવ રહેવાનો અંદાજ વ્યક્ત કરવામાં આવ્યો છે.
બિહારમાં વિધાનસભાની કુલ ૨૪૩ બેઠકો છે. બહુમતી માટે ૧૨૨
બેઠકોની જરૃર છે. બિહારમાં એનડીએના ઘટક દળો ભાજપ, જદયુ,
એલજીપી (રામ વિલાસ)એ સાથે મળીને ચૂંટણી લડી હતી. જ્યારે ઇન્ડિયા ગઠબંધનના ઘટક
દળો કોંગ્રેસ, રાજદ અને
ડાબેરી પક્ષોએ સાથે મળીને ચૂંટણી લડી હતી.
