પાણીમાંથી કાઢી સીપીઆર અપાયો પરંતુ જીવ ન બચ્યો
પુત્રના જન્મદિવસ અને મેરેજ એનિવર્સરીની ઉજવણી કરવા પરિવાર સાથે રિસોર્ટમાં આવેલો યુવાન અચાનક બેભાન બની સ્વિમિંગ પુલમાં પડી ગયો
જેતપુર: ગોંડલ તાલુકાના કાગવડ પાસે આવેલા રિસોર્ટમાં આજે એક હ્ય્દયદ્રાવક ઘટના બની હતી. પરિવાર સાથે દીકરાના જન્મદિવસ અને લગ્ન વર્ષગાંઠની ઉજવણી કરવા ગયેલા ૩૩ વર્ષીય યુવકનું અચાનક બેભાન થઇ ફસડાઇને સ્વિમિંગ પૂલમાં પડવાથી કરૂણ મોત નીપજ્યું હતું.
ગોંડલના નવાગામના રહેવાસી અજયભાઇ ભાણજીભાઇ રાઠોડ (ઉ.વ.૩૩) આજે સવારે ૧૧ વાગ્યાની આસપાસ પરિવાર સાથે પિકનિક માટે હેવન રિસોર્ટ પહોંચ્યા હતા. શનિવારે તેમના પુત્ર વિહાનનો જન્મદિવસ હતો અને આજે અજયભાઇની મેરેજ એનિવર્સરી હોવાથી પરિવારમાં ઉત્સાહ હતો.
બપોરે આશરે ૧ વાગ્યાના સુમારે અજયભાઇ તેના ૯ વર્ષના પુત્ર સાથે સ્વિમિંગ પૂલમાં નહાઇને બહાર ઉભા હતા. આ દરમિયાન તે અચાનક બેભાન બની પાણીમાં ગરકાવ થઇ ગયા હતા. સ્વિમિંગ પૂલ આસપાસ હાજર અન્ય લોકોએ તેને તાત્કાલિક બહાર કાઢી સીપીઆર આપી બચાવવાનો પ્રયાસ કર્યો હતો. ત્યારબાદ ૧૦૮ મારફતે તેમને તાત્કાલિક વીરપુર હોસ્પિટલ લઇ જવામાં આવ્યા હતા, પરંતુ હોસ્પિટલ પહોંચતા પહેલા જ રસ્તામાં તેનું મોત નીપજ્યું હતું. ફરજ પરના તબીબોએ તેને મૃત જાહેર કર્યા હતા.
મૃતકના પરિવારમાં માતા-પિતા, પત્ની, નાનો ભાઇ અને ૯ વર્ષનો પુત્ર છે. અચાનક બનેલા કરૂણ બનાવના પગલે સમગ્ર નવાગામ અને પરિવારમાં ઘેરા શોકની લાગણી વ્યાપી ગઇ છે. મૃતદેહને હાલ ગોંડલ સિવિલ હોસ્પિટલ ખસેડવામાં આવ્યો છે, ત્યારબાદ સચોટ કારણ જાણવા માટે રાજકોટ સિવિલ હોસ્પિટલ ખાતે ફોરેન્સિક પોસ્ટમોર્ટમ કરાવવાની તજવીજ હાથ ધરવામાં આવશે.
