વડોદરા, તા.5 ડભોઇ તાલુકાના કાયાવરોહણ ગામની સીમમાં કેનાલ પાસેની ઝાડીઓમાં દારૃ અને બીયરના જથ્થાની સંભાળ રાખતા એક શખ્સ અને ત્રણ કિશોરોને પોલીસે હસ્તગત કરી જથ્થો કબજે કર્યો હતો જ્યારે દારૃ મંગાવનાર બૂટલેગર ફરાર થઇ ગયો હતો.
પ્રાપ્ત માહિતી મુજબ કારવણથી નાના ફોફડીયા ગામ જવાના રસ્તા પર ચુડેલ માતાજીના મંદિરની સામે માઇનોર કેનાલ પાસેની ઝાડીઓમાં કાયાવરોહણના દારૃના ધંધાર્થી રમેશ ઉર્ફે બકો ભાણાભાઇ રાઠોડિયાએ દારૃનો મોટો જથ્થો સંતાડયો છે અને તેને ટૂંક સમયમાં વગે કરવાનો છે તેવી માહિતીના આધારે જિલ્લા એલસીબીએ ગઇ રાત્રે દરોડો પાડતા ત્રણ સગીર સહિત ચાર શખ્સો મળ્યા હતાં.
પોલીસે સન્ની ઉર્ફે લાલુ સુરેશ રાઠોડ (રહે.મણીનગર, ગામ મોગરાવાડી, જિલ્લો વલસાડ)ને ઝડપી પાડયો હતો જ્યારે અન્ય ત્રણ સગીરને હસ્તગત કર્યા હતાં. પોલીસે રૃા.૮.૪૪ લાખ કિંમતની ૩૧૪૪ નંગ દારૃની બોટલો અને બીયરના ટીન તેમજ ત્રણ મોબાઇલ મળી કુલ રૃા.૮.૫૯ લાખનો મુદ્દામાલ કબજે કર્યો હતો. સન્ની ઉર્ફે લાલુની પૂછપરછમાં તેણે જણાવેલ કે રમેશ ઉર્ફે બકાએ દારૃ સંતાડયો હતો અને તેની દેખરેખ અમો રાખતા હતાં. પોલીસે રમેશ ઉર્ફે બકાની શોધખોળ હાથ ધરી છે.
