અમદાવાદ,ગુરુવાર,11
સપ્ટેમ્બર,2025
કેન્દ્ર સરકાર દ્વારા ટેલિકોમ્યુનિકેશન્સ એકટ-૨૦૨૩ હેઠળ
ટેલિકોમ્યુનિકેશન્સના ઘડેલા નિયમો મુજબ અમલ કરવા
અમદાવાદ મ્યુનિસિપલ કોર્પોરેશને નિર્ણય કર્યો છે.આ એકટના અમલ માટે કેન્દ્ર
અને રાજય સરકારે કરેલા ઠરાવને અનુસરવામા આવશે.આગામી સમયમાં અંડર ગ્રાઉન્ડ કેબલના
બદલે વિવિધ લોકેશન ઉપર મોબાઈલ ટાવર ઉભા કરવા મંજૂરી અપાશે.નોંધપાત્ર બાબત એ છે કે
શહેરના અલગ અલગ વિસ્તારોમાં વિવિધ કંપનીઓના ૨૨૦૦ મોબાઈલ ટાવર આવેલા છે.જે પેટે રુપિયા
૧૭ કરોડ ભાડુ કોર્પોરેશને વસૂલવાનુ બાકી છે.વિવિધ કંપનીઓએ અંડરગ્રાઉન્ડ નાંખેલા
કેબલ પેટે કેટલી રકમ વસૂલવાની બાકી છે તે અંગે કોર્પોરેશનના અધિકારીઓ જવાબ આપી
શકયા નહતા.
અલગ અલગ લોકેશન ઉપર ઉભા કરવામા આવતા મોબાઈલ ટાવરના કારણે
પક્ષીઓ સાથે માનવીઓ ઉપર પણ તેની આડઅસર થતી હોવા અંગે અગાઉ અનેક રીપોર્ટ જાહેર
કરવામા આવેલા છે. આમ છતાં કોર્પોરેશનની
સ્ટેન્ડિંગ કમિટીની બેઠકમાં ૧ જાન્યુઆરી-૨૫થી કેન્દ્ર અને રાજય સરકારના ઠરાવ મુજબ
ટેલીકોમ ઈન્ફ્રાસ્ટ્રકચર ફેસીલીટી માટે મ્યુનિસિપલ કોર્પોરેશન હદ વિસ્તારમાં વિવિધ
લોકેશન ઉપર મોબાઈલ ટાવર ફાઉન્ડેશન તથા સુપર સ્ટ્રકચરને મંજૂરી આપવા દરખાસ્ત મંજૂર
કરાઈ હતી.આ અંગે ડેપ્યુટી મ્યુનિસિપલ કમિશનરના કહેવા મુજબ, અગાઉ કોર્પોરેશન
દ્વારા જે ભાડુ લેવાતુ હતુ તે મુજબ ભાડુ તો લેવાશે.તેમના દાવા પ્રમાણે અગાઉ
જંત્રીના ૪૦ ટકા લેખે ૨૦ વર્ષ માટે ભાડુ લેવાતુ હતુ તેને બદલે દર વર્ષે પંદર ટકા લેખે
ભાડુ વસૂલાશે.ઉલ્લેખનીય છે કે,
મ્યુનિસિપલ કોર્પોરેશન પાસેથી સાત ઝોનના વિવિધ લોકેશન ઉપર અંડરગ્રાઉન્ડ કેબલ
નાંખવા અલગ અલગ ટેલિકોમ્યુનિકેશન્સ કંપનીઓએ રોડ ઓપનીંગ પરમીશન લીધા પછી
કોર્પોરેશનને કેટલી રકમ ભાડા પેટે અને કેટલી રકમ ટેકસ પેટે વસૂલ કરવાની બાકી નીકળે
છે એ અંગે ચોકકસ જવાબ આપતા અધિકારીઓ ફાંફે ચઢી ગયા હતા .આખા અમદાવાદમાં કેટલા
મોબાઈલ ટાવર છે કેટલી કોર્પોરેશનની આવક છે તે વિગતો પણ તેમની પાસે નહતી.
