અમદાવાદ, શનિવાર
અમદાવાદ મ્યુનિસિપલ કોર્પોરેશનના એસ્ટેટ વિભાગમાં આસીસટન્ટ એસ્ટેટ ઓફિસર, ઇન્સ્પેક્ટર અને સહાયક સબ ઇન્સ્પેક્ટરની કુલ ૭૮ જેટલી જગ્યા ભરવા માટેની જાહેરાત કરવામાં આવી છે. પરંતુ, આ ભરતી જાહેરાત વિવાદમાં આવી છે. આ જાહેરાત અંગે વાંધા અરજી કરવામાં આવી છે. જેેમાં જણાવવામં આવ્યું છે કે આ જાહેરાત પહેલા ત્રણેય પોસ્ટ માટે આવેલી ભરતીની જાહેરાતમાં ઉમેદવારને ત્રણ થી પાંચ વર્ષનો અનુભવ ફરજિયાત હતો. પરંતુ, નવી જાહેરાતમાં કોઇપણ અનુભવ જરૂરી નથી કરાયો. તેમજ અતિમહત્વની જવાબદારી ધરાવતા ઉમેદવારની પસંદગી થાય તો મોટો વિવાદ થવાની શક્યતા છે.
અમદાવાદ મ્યુનિસિપલ કોર્પોરેશનના એસ્ટેટ-ટીડીઓ વિભાગ દ્વારા સાત આસીટન્ટ એસ્ટેટ ઓફિસર, ૨૩ એસ્ટેટ ઇન્સ્પેક્ટર અને સહાયક સબ ઇન્સ્પેક્ટરની ૪૮ પોસ્ટની જાહેરાત કરવામાં આવી છે. કોર્પોરેશનના એસ્ટેટ વિભાગ માટે આ ત્રણેય પોસ્ટ ખુબ મહત્વની છે. આ તમામ જગ્યા પૈકી આસી. એસ્ટેટ ઓફિસર અને ઇન્સ્પેક્ટર સહિતની ત્રણેય પોસ્ટ માટે બી.ઇ સિવિલ ની લાયકાત કોઇપણ અનુભવને ફરજિયાત કરાયો નથી. આ ભરતી માટે અરજી કરવાની છેલ્લી તારીખ ૩ ડીસેમ્બર છે. પરંતુ, એસ્ટેટ વિભાગ દ્વારા જાહેર કરવામાં આવેલી ભરતી વિવાદમાં આવી છે.
એસ્ટેટ વિભાગની આ પોસ્ટની જાહેરાત સંદર્ભમાં મ્યુનિસિપલ કમિશનરને વાંધા અરજી કરવામાં આવી છે. જેમાં ગ્રેડ પે વાળી ભરતીમાં અનુભવ અંગે અસમાનતાનો ઉલ્લેખ કરાયો છે. સાથે આ પોસ્ટમાં માત્ર બી.ઇ સિવિલ પુરતી શૈક્ષણિક લાયકાતની સામે કોઇ અનુભવની માંગણી કરવામાં આવી નથી. જ્યારે હાલમાં લાઇટ ડીપાર્ટમેન્ટ દ્વારા કરવામાં આવેલી આસીટન્ટ એન્જીનીયરની જાહેરાતમાં બીઇ સિવિલની શૈક્ષણિક લાયકાતની ત્રણ વર્ષનો અનુભવ ફરજિયાત રાખવામાં આવ્યો છે.
જ્યારે એસ્ટેટ વિભાગની ભરતીમાં કોઇપણ પ્રકારના અનુભવને ફરજીયાત નથી બનાવાયો. આમ, બંને ભરતીમાં અનુભવનો તફાવત આવતા અસંગતતા ઉભી થઇ શકે તેમ છે. રાજ્ય સરકારના વિવિધ વિભાગ અને અન્ય વિભાગોમાં વર્ગ-૨ની ભરતીમાં લેખિત ઉપરાંત, મૌખિક પરીક્ષા લેવામાં આવે છે. જેથી મહત્વની પોસ્ટ માટે યોગ્ય ઉમેદવારની પસંદગી થઇ શકે.
ખાસ કરીને એસ્ટેટ વિભાગની પોસ્ટ માટે જવાબદારી તેમજ જાણકારી હોવી જરૂરી છે. જેમાં લેન્ડ મેનેજમેન્ટ, ટાઉન ડેવેલોપમેન્ટ અને એસ્ટેટ એડમીનીસ્ટ્રેશન જેવા વિષયની જાણકારી જરૂરી છે. જેથી એસ્ટેટ વિભાગમાં મહત્વની પોસ્ટને લઇને વિવાદ થઇ શકે છે. જેથી ભરતીની જાહેરાતમાં જરૂરી સુધારો કરીને અનુભવ ફરજિયાત કરવામાં આવે તેવી માંગણી કરવામાં આવી છે.
