બરોડાના વિકેટકીપર-બેટ્સમેન અમિત પાસીએ પોતાના ટી ૨૦ડેબ્યુમાં જ તોફાની બેટિંગ કરતાં ૧૧૪ રન ફટકારી વિશ્વ રેકોર્ડની બરાબરી કરી છે. આ સિદ્ધિના સન્માનરૂપે આજે શાલ ઓઢાડી એમનું સન્માન કરાયું હતું.
હૈદરાબાદ ખાતે યોજાયેલી સૈયદ મુશ્તાક અલી ટ્રોફીની ગ્રુપ -સીની સર્વિસીસ સામેની મેચમાં તેમણે ૫૫ બોલમાં આ રન બનાવ્યા હતા, જેમાં ૯ છગ્ગા અને ૧૦ ચોગ્ગાનો સમાવેશ થાય છે. સાઉથ આફ્રિકા સામેની ટી ૨૦ શ્રેણી માટે રવાના થયેલા જીતેશ શર્માના સ્થાને અમિત પાસીને બરોડાની પ્લેઇંગ ઇલેવનમાં તક મળી હતી. આજે ક્રિકેટ એકેડમી ખાતે અમિત પાસીને વિશેષ સન્માન આપવામાં આવ્યું હતું. ખેલાડી અને શુભેચ્છકોએ મોં મીઠું કરાવ્યું હતું અને પુષ્પગુચ્છ આપ્યા હતા.
અમિત પાસીએ જણાવ્યું હતું કે, નાનપણથી ક્રિકેટ પ્રત્યેનો લગાવ જ તેમને અહીં સુધી લઈને આવ્યો છે. પરિવારે હંમેશાં સાથે આપ્યો, અકોટા ક્રિકેટ ગ્રાઉન્ડ ખાતે નિયમિત પ્રેક્ટિસ કરું છું. ડેબ્યુ મેચમાં થોડો નર્વસ હતો, પરંતુ તક મળી એટલે મન મૂકીને રમી અને ટીમ માટે સારું પર્ફોમન્સ આપ્યું એમ તેમણે જણાવ્યું હતું. તેમના કોચ ઝેદ મિર્ઝાએ કહ્યું હતું કે, અમિત પાસીનું આ પ્રદર્શન તમામ યુવા ક્રિકેટરો માટે પ્રેરણાદાયી છે. અમે ઘણા વર્ષોથી તેમની મહેનત નિહાળી છે.
