ગુરૂવારની સાંજ સુધીમાં દબાણો દૂર કરવા તાકિદ કરાઈ હતી
આરએન્ડબી વિભાગ, નગરપાલિકાના કર્મચારીઓ દ્વારા આજે પોલીસ બંદોબસ્ત સાથે ગેરકાયદે દબાણો દૂર કરાશે
નડિયાદ: ખેડા શહેરમાં લાંબા સમયથી માર્ગો અને ફૂટપાથ પર વધી રહેલા ગેરકાયદેસર દબાણોને કારણે વાહનવ્યવહાર તેમજ સામાન્ય નાગરિકોને પડી રહેલી હાલાકી અંગે જિલ્લા કલેક્ટરે ગંભીર નોંધ લીધી હતી અને સમસ્યાના નિરાકરણ માટે ગેરકાયદે દબાણોને દૂર કરવાનો આદેશ આપ્યો હતો. ગુરૂવારે તંત્ર દ્વારા શહેરના મુખ્ય બજારોમાં દબાણર્તાઓને મૌખિક રીતે દબાણો દૂર કરી લેવા તાકિદ કરી હતી અને શુક્રવારે તંત્ર કાર્યવાહી કરશે તે અંગે માહિતગાર કર્યા હતા.
ગુરૂવારે સઘન ચેકિંગ દરમિયાન ટીમો દ્વારા દબાણ કરનારા તમામ દુકાનદારો અને વેપારીઓને મૌખિક રૂપે દબાણો સ્વેચ્છાએ અને તાત્કાલિક દૂર કરી દેવા માટેની સ્પષ્ટ સૂચના આપવામાં આવી હતી. તંત્ર દ્વારા સ્પષ્ટતા કરવામાં આવી હતી કે, સાંજ સુધીમાં આ દબાણો દૂર કરવામાં નહીં આવે, તો શુક્રવાર, ૦૫ ડિસેમ્બરે ખેડા આરએન્ડબી વિભાગ અને ખેડા નગરપાલિકાના કર્મચારીઓ દ્વારા જેસીબી મશીનરીની મદદથી આ તમામ ગેરકાયદે દબાણોને દૂર કરવામાં આવશે. દબાણ હટાવવાની કાર્યવાહીમાં પોલીસ વિભાગ દ્વારા પૂરતો બંદોબસ્ત પૂરો પાડવામાં આવશે, જેથી કાયદો અને વ્યવસ્થા જળવાઈ રહે. દબાણ હટાવવાની આ ઝુંબેશ દરમિયાન કોઈ વ્યક્તિ કે વેપારી તંત્રની કામગીરીમાં અવરોધ ઊભો કરશે, તેની સામે પોલીસ દ્વારા કાયદેસરના પગલાં લેવામાં આવશે. સમગ્ર શહેરમાં આ ડિમોલિશન ડ્રાઇવને લઈને દબાણ કરનારાઓમાં ફફડાટ ફેલાયો છે.
