કમોસમી વરસાદથી પ્રભાવિત ખેડૂતોને રાહત
૨૭,૫૩૫ મેટ્રિક ટન મગફળીની ખરીદી કરીને ૧,૩૭૨ ખેડૂતોને ૧,૫૬૧ લાખથી વધુનું ચૂકવણું
નડિયાદ: રાજ્ય સરકાર દ્વારા ખેડા જિલ્લાના હજારો ખેડૂતોને આથક સહાય અને પાકના ટેકાના ભાવનો લાભ મળ્યો છે. તેમજ કમોસમી વરસાદને કારણે થયેલા નુકસાન સામે જાહેર કરવામાં આવેલા બે અલગ અલગ રાહત પેકેજ હેઠળ અત્યાર સુધીમાં જિલ્લાના ૯૧,૮૨૩ ખેડૂતોને કુલ ૧૮૦.૬૩ કરોડની રકમ ચૂકવવામાં આવી છે.
રાજ્યમાં કૃષિ રાહત પેકેજની અમલવારી પર નજર કરીએ તો અત્યાર સુધીમાં ૩૦ લાખથી વધુ ખેડૂતોના કુલ ૮,૭૧૦ કરોડના ઓનલાઇન બિલો તૈયાર કરવામાં આવ્યા છે. જેમાંથી ૨૯.૩૦ લાખ ખેડૂતોને ૮,૫૧૬ કરોડથી વધુની સહાય ચૂકવી દેવામાં આવી છે. ખેડા જિલ્લામાં આ કામગીરી વેગવાન બનાવીને મહત્તમ અસરગ્રસ્તોને આવરી લેવામાં આવ્યા છે. કૃષિ સહાય ઉપરાંત રાજ્યમાં મગફળી, મગ, અડદ અને સોયાબીન જેવા પાકોની ટેકાના ભાવે ખરીદીની પ્રક્રિયા પણ સમાંતર રીતે ચાલી રહી છે. ખેડા જિલ્લામાં આ પ્રક્રિયા હેઠળ ૨૭,૫૩૫ મેટ્રિક ટનથી વધુ મગફળીની ખરીદી કરવામાં આવી છે. આ ખરીદીના બદલામાં જિલ્લાના ૧,૩૭૨ ખેડૂતોને કુલ ૧,૫૬૧ લાખથી વધુની રકમનું ચૂકવણું કરવામાં આવ્યું છે. રાજ્યભરમાં અત્યાર સુધીમાં ૬.૭૯ લાખથી વધુ ખેડૂતો પાસેથી ૧૦,૬૯૮ કરોડથી વધુની કિંમતના કુલ ૧૪.૯૧ લાખ મેટ્રિક ટન જથ્થાની ખરીદી થઈ છે, જેની સામે ૪.૧૬ લાખથી વધુ ખેડૂતોને ૬,૫૭૩ કરોડની ચુકવણી કરવામાં આવી છે.
