અખિલ ભારતીય કોળી સમાજના પ્રદેશ મહામંત્રી રસિક ચાવડાની કેન્દ્રીય મંત્રીશ્રીને રજૂઆત
ઉના:
દેશના અર્થતંત્રના મુખ્ય આધાર એવા ખેડૂતોને ખેતીકામમાં પડતી મુશ્કેલીઓનો તાત્કાલિક નિકાલ લાવવા માટે અખિલ ભારતીય કોળી સમાજ, ગુજરાતના પ્રદેશ મહામંત્રી શ્રી રસિક ચાવડા દ્વારા ભારત સરકારના પેટ્રોલિયમ અને કુદરતી ગેસ મંત્રાલયના માનનીય મંત્રીશ્રીને એક લેખિત રજૂઆત કરવામાં આવી છે.
આ રજૂઆતમાં જણાવવામાં આવ્યું છે કે, વર્તમાન સમયમાં ખેતીમાં આધુનિકીકરણ અને યાંત્રીકીકરણ ખૂબ જ વધ્યું છે. ટ્રેક્ટર, થ્રેસર, પંપસેટ જેવા અનિવાર્ય કૃષિ સાધનો ચલાવવા માટે ડીઝલ એ ખેડૂતોની પ્રાથમિક અને સૌથી મોટી જરૂરિયાત બની ગયું છે. પરંતુ, છેલ્લા કેટલાક સમયથી ગ્રામ્ય વિસ્તારોમાં ડીઝલના સપ્લાયમાં તંગી વર્તાઈ રહી છે,
જેના કારણે જગતના તાતને ભારે હાલાકીનો સામનો કરવો પડી રહ્યો છે. જો આ સમસ્યાનો સમયસર ઉકેલ નહીં આવે, તો તેની સીધી નકારાત્મક અસર કૃષિ ઉત્પાદન અને દેશની ખાદ્ય સુરક્ષા પર પડી શકે છે.
ખેડૂતોના હિતમાં શ્રી રસિક ચાવડા દ્વારા કેન્દ્રીય મંત્રીશ્રી સમક્ષ મુખ્યત્વે નીચે મુજબની માગણીઓ મૂકવામાં આવી છે. વાવણી અને લણણી જેવી મુખ્ય ખેતીની સીઝન દરમિયાન ગ્રામીણ વિસ્તારના તમામ પેટ્રોલ પંપો પર ડીઝલનો પૂરતો જથ્થો જળવાઈ રહે તેવી ચુસ્ત વ્યવસ્થા કરવામાં આવે.
ગ્રામ્ય વિસ્તારના પંપો પર કૃષિ સાધનો માટે ડીઝલ લેવા આવતા ખેડૂતોને અગ્રતાના ધોરણે ઇંધણ મળી રહે તેવા સ્પષ્ટ નિર્દેશો જારી કરવામાં આવે. કટોકટી કે તંગીના સમયે પણ ખેતીકામ ખોરવાય નહીં તે માટે સ્થાનિક ડેપો સ્તરે ખેડૂતો માટે ડીઝલનો ચોક્કસ જથ્થો અનામત રાખવાની જોગવાઈ ઊભી કરવામાં આવે.ખેડૂતો જ્યારે કેન (કેરબા) કે બેરલમાં ખેતીના હેતુ માટે ડીઝલ લેવા જાય, ત્યારે તેમને કોઈ પણ પ્રકારની વહીવટી કે ટેકનિકલ મુશ્કેલી ન નડે તેની ખાસ તકેદારી રાખવામાં આવે.
અખબારી યાદી અંતે અખિલ ભારતીય કોળી સમાજના પ્રદેશ મહામંત્રી શ્રી રસિક ચાવડાએ આશા વ્યક્ત કરી છે કે, કેન્દ્રીય મંત્રીશ્રી આ બાબતની ગંભીરતા સમજીને સંબંધિત ઉચ્ચ અધિકારીઓ તથા ઓઇલ કંપનીઓને તાકીદે યોગ્ય પગલાં લેવા સૂચના આપશે અને ખેડૂત હિતમાં સત્વરે હકારાત્મક નિર્ણય લેવાશે.
