ગાંધીનગર સરખેજ હાઇવે ઉપર
અમદાવાદ વાસણાના બે યુવાન લગ્ન પ્રસંગમાં હાજરી આપીને પરત જઈ રહ્યા હતા તે સમયે અકસ્માતની ઘટના
ગાંધીનગર: ગાંધીનગર શહેર નજીક સરખેજ હાઇવે ઉપર ખોરજ પાસે બાઈક ઉપર પસાર થઈ રહેલા બે યુવાનોને પૂર ઝડપે જતા અજાણ્યા વાહન ચાલકે હડફેડે લેતા અકસ્માત સર્જાયો હતો અને જે પૈકી સારવાર દરમિયાન એક યુવાનનું મોત થયું છે. આ ઘટના અંગે પોલીસે ગુનો દાખલ કરી તપાસ હાથ ધરી હતી.
ગાંધીનગર જિલ્લાના હાઇવે માર્ગો ઉપર અકસ્માતની ઘટનાઓ વધી રહી છે ત્યારે તેમાં પણ હીટ એન્ડ રનના બનાવોમાં ચિંતાજનક રીતે વધારો થઈ રહ્યો છે. આ સ્થિતિમાં ગાંધીનગર સરખેજ હાઇવે ઉપર ખોરજ પાસે વધુ એક હિટ એન્ડ રનની ઘટનામાં બાઈક સવાર યુવાનનું મોત થયું છે. આ ઘટના અંગે પોલીસ સૂત્રોમાંથી મળતી વિગતો પ્રમાણે અમદાવાદના વાસણા વિસ્તારમાં રહેતા મહેન્દ્રભાઈ ખત્રીનો પુત્ર પારસ અને તેમના સગા નવીનભાઈ ડોડીયા ૩૧ જાન્યુઆરીના રોજ ઝાઝરવા ગામે લગ્ન પ્રસંગમાં ગયા હતા. જ્યાંથી તેઓ રવિવારે વહેલી સવારે તેમનું બાઈક લઈને પરત ઘર તરફ આવી રહ્યા હતા. આ દરમિયાન ગાંધીનગર સરખેજ હાઇવે ઉપર ખોરજ પાસે ઉતરાણ પર કોઈ અજાણ્યા વાહને તેમની બાઈકને જોરદાર ટક્કર મારી હતી. અકસ્માત સર્જીને અજાણ્યો વાહન ચાલક ફરાર થઈ ગયો હતો. જ્યારે આસપાસના લોકો પણ દોડી આવ્યા હતા અને અકસ્માતમાં ગંભીર રીતે ઘવાયેલા બંને યુવાનોને તાત્કાલિક અમદાવાદ સોલા સિવિલ હોસ્પિટલ ખસેડવામાં આવ્યા હતા. પારસને માથા અને પગના ભાગે ગંભીર ઈજાઓ હોવાથી તેને વધુ સારવાર માટે સાલ હોસ્પિટલ ખસેડાયો હતો, જ્યાં સોમવારે તેનું સારવાર દરમિયાન મોત થયું હતું. જેથી હાલ અડાલજ પોલીસ દ્વારા આ મામલે અકસ્માતનો ગુનો દાખલ કરીને વધુ તપાસ શરૂ કરવામાં આવી છે.
