Gun Culture Rising in Gujarat: ગુજરાતમાં પણ છાનાપગલે ગન કલ્ચર વિસ્તરી રહ્યું છે. છેલ્લા 5 વર્ષમાં જ 5204 લોકોએ ગન લાયસન્સ મેળવ્યા છે. જેમાં અમદાવાદથી સૌથી વધુ 690, રાજકોટથી 540 જ્યારે દાહોદથી 487 લોકોએ બંદૂક રાખવાનો પરવાનો મેળવી લીધો છે. વધતા જતા હથિયારના ક્રેઝ આગામી સમયમાં ગુનાખોરીના આંકડામાં વધારો લાવી શકે તેવી ભીતિ સેવાઈ રહી છે.
ગુજરાતમાં અન્ય રાજ્યમાંથી લાઈસન્સ લાવવાનો કારોબાર
રાઇટ ટુ ઈન્ફોર્મેશનથી પ્રાપ્ત થયેલી માહિતી અનુસાર, 5 વર્ષમાં 200થી વધુ લોકોને ગન લાયસન્સ અપાયા હોય તેવા રાજ્યમાં સુરત, સુરેન્દ્રનગર, છોટા ઉદેપુર, વડોદરા, મોરબી, ગાંધીનગર, બનાસકાંઠા અને જૂનાગઢનો પણ સમાવેશ થાય છે. તાજેતરમાં જ મણિપુર, નાગાલેન્ડથી સંખ્યાબંધ બોગસ હથિયાર લાયસન્સ અને તેના પર કારતૂસો ખરીદવાના મામલે એન્ટિ ટેરરિસ્ટ સ્ક્વોડે 66 આરોપીઓને ઝડપી લઇને તેમની સામે ચાર્જશીટ કરી દીધી છે. ગુજરાતમાં બીજા રાજ્યમાંથી લાઈસન્સ લાવવાનો કારોબાર વર્ષોથી ચાલે છે. જમ્મુ-કાશ્મીરથી ગન લાયસન્સ કૌભાંડ પકડી ક્રાઈમ બ્રાન્ચે અમદાવાદના મોટા માથાઓ સામે કાર્યવાહી કરી પછી વર્ષ 2007માં પણ જમ્મુ-કાશ્મીરના બોગસ ગન લાયસન્સ ષડયંત્રનો પર્દાફાશ થયો હતો. આ પછી નાગાલેન્ડના બોગસ ગન લાયસન્સનો ઘટસ્ફોટ થયો હતો.
ગન લાયસન્સ મેળવવા માટે કુલ 113 નિયમોનો અમલ કરવાના હોય છે. પરંતુ બીજા રાજ્યમાંથી લાયસન્સ અપાવતાં એજન્ટો અને પૈસા એટલા મજબૂત છે કે બીજા રાજ્યોના લાયસન્સના આધારે ગુજરાતમાં ગન કલ્ચર સતત ભયજનક રીતે વિસ્તરી રહ્યું છે. બીજા રાજ્યના લાયસન્સના આધારે ગુજરાતમાં ગન ખરીદવાનું હવે આસાન નથી. ગન વેચતા મોટાભાગના વેપારીઓ અન્ય રાજ્યના લાયસન્સ ઉપર હથિયાર વેચતા ન હોવાથી હરિયાણા, દિલ્હીથી ગન ખરીદીમાં પણ એજન્ટોની ચેઈન સક્રિય છે.
આ પણ વાંચો: ગુજરાતમાં 5 વર્ષમાં માત્ર 6000 લોકોએ તમાકુનું વ્યસન છોડ્યું, જાગૃકતા ફેલાવવામાં તંત્રનું નીરસ વલણ
ગન લાયસન્સ કોને મળી શકે?
ગન લાયસન્સ માટે અરજી કરનારાએ ત્રણ વર્ષના આઈ.ટી. રિટર્ન ભરેલા હોવા જોઈએ. પરવાનગી માગનાર સામે કોઈ ફોજદારી કેસ ચાલતો હોવો જોઇએ નહીં. જમીનની સુરક્ષા અથવા પોતાની કે પરિવારની સુરક્ષાની જરૂરિયાત હોવી જોઈએ. સામાન્ય રીતે મોટા વ્યવસાયમાં કોઇ દુશ્મનાવટની ભીતિ હોવાના કારણે પણ લોકો અરજી કરતા હોય છે. આ સાથે અરજદારે ટ્રેનિંગ સર્ટિફિકેટ આપવું પડે છે. સમાયંતરે ચૂંટણી, રથયાત્રા કે પછી અન્ય મોટા તહેવાર દરમિયાન હથિયાર સ્થાનિક પોલીસ સ્ટેશનમાં જમા કરાવવાનું રહે છે. હથિયાર લીધા બાદ ચોક્કસ મહિને બુલેટનો હિસાબ આપવાનો રહે છે.
અમદાવાદમાં ગન લાયસન્સની અરજીઓનું પ્રમાણ વધ્યું
અમદાવાદમાં વર્ષ 2024માં કુલ 259 અરજીમાંથી ગન માટે આવેલી કુલ 98 અરજીમાંથી 34 મંજૂર અને 61 નામંજૂર થવાની સાથે 3 ફાઇલ પેન્ડિંગ છે. રિવોલ્વર, પિસ્તોલ અને રાયફલ માટે આવેલી 161 અરજીમાંથી 37 મંજૂર અને 18 નામંજૂર થઈ છે. જ્યારે 106 અરજીઓ હાલ પણ પેન્ડિંગ છે. વર્ષ 2023માં કુલ 191 અરજીમાંથી ગન માટે આવેલી કુલ 55 અરજીઓમાંથી 31 મંજૂર અને 24 નામંજૂર થઈ હતી. જ્યારે રિવોલ્વર, પિસ્તોલ અને રાયફલ માટે આવેલી 136 અરજીમાંથી 46 મંજૂર અને 56 નામંજૂર થઈ હતી. આ આંકડા પ્રમાણે હથિયાર પરવાના મેળવનાર લોકોમાં રિવોલ્વર, પિસ્તોલ અને રાયફલનો ક્રેઝ વધારે હોવાનું માનવામાં આવે છે.
