સુરત સહિત ગુજરાતમાં વરસાદી માહોલ વચ્ચે સુરતીઓ મનભરીને નવરાત્રિની ઉજવણી કરી રહ્યાં છે તો બીજી તરફ સુરત- ભારત છોડીને વિદેશમાં સ્થાયી થયેલા ગુજરાતીઓ માટે નવરાત્રિ નવ દિવસ નહીં પરંતુ વીક એન્ડમા વધુ જોવા મળે છે. દર વર્ષની જેમ આ વર્ષે પણ અમેરિકા, કેનેડા, ઓસ્ટ્રેલિયા, ન્યુઝીલેન્ડ સહિતના દેશોમાં ગરબાનું આયોજન કરવામાં આવ્યું છે. જેમાં કેટલીક જગ્યાએ વીક એન્ડમાં તો કેટલીક જગ્યાએ નવે નવ દિવસ ગરબાનું આયોજન થાય છે અને ત્યાં પરંપરાગત ગરબા જ જોવા મળે છે.
સૌથી વધુ ગુજરાતીઓ વસવાટ કરે છે તેવા કેનેડાના અનેક વિસ્તારમાં નવરાત્રિનું આયોજન મોટા પાયે થાય છે. તેમાં પણ ટોરેન્ટોના વુડબાઈન પાર્કિંગ લોટ માં મોટું આયોજન કરાયું હતું ગઈકાલ શનિવારે વીક એન્ડમાં આ ગ્રાઉન્ડમાં 10 હજારથી વધુ ગુજરાતીઓ- ભારતીઓ ગરબે ઘૂમ્યા હતા. એટલું જ નહીં પરંતુ અહીંની નવરાત્રિમાં ફિલ્મી ગીત નહી પરંતુ પરંપરાગત ગરબા સાથે ગરબામાં જય શ્રી રામ, રાજા રણછોડ ના નારા ગૂંજ્યા હતા. અંકિત પટેલ અને મિલન પ્રજાપતિ કહે છે, નવરાત્રિમાં વીક એન્ડ હોય તેની અમે આતુરતાથી રાહ જોતા હોય છે અને આ દિવસની નવરાત્રિ માં જઈએ એટલે ભારતની નવરાત્રિ ની ખોટ થોડી પુરાતી હોય તેવું લાગે છે.
ન્યુઝીલેન્ડના ઓકલેન્ડમાં ઈવેન્ટ ફિડા સ્ટેડિયમમાં વીક એન્ડમાં નવરાત્રિનું આયોજન થાય છે. નવરાત્રિના વીક એન્ડમાં આ જગ્યા મીની ગુજરાત- મીની ભારત બની જાય છે. ઓકલેન્ડમાં રહેતા રિધ્ધિ- શિવમ દેસાઈ કહે છે, માત્ર ભારતીયો જ નહી પરંતુ અહીના સ્થાનિક લોકો પણ ગરબે ઘુમવા આવે છે.અહી માત્ર ગુજરાતી અને પરંપરાગત ગુજરાતી ગરબા જ ગવડાવે છે અને તેના તાલે જ અમે ગરબા રમીએ છીએ.
ઓસ્ટ્રેલિયાના બ્રિસબેનમાં પણ ગરબાનું આયોજન થાય છે તેમાં મોટા ભાગે ગુજરાતી વીક એન્ડમાં ગરબા રમવા આવે છે તેવું કેયુ પટેલ કહે છે. તેઓ વધુમાં કહે છે, અહી ઓપન સ્પેસમાં નવરાત્રિનું આયોજન થાય છે અને ગુજરાતી ગાયક આવે છે અને ગુજરાતીઓને ગરબે ઘુમાવે છે.
હાલ ભારત સાથેના સંબંધના કારણે સૌથી વધુ ચર્ચામાં છે તેવા અમેરિકામાં પણ નવરાત્રિ નું ધમાકેદાર આયોજન થાય છે. મૂળ સુરત કોસાડ અને અમેરિકાના ઉત્તર કેરોલીના હિકરીમાં રહેતા રીન્કુ પટેલ કહે છે, અમે ભારતની નવરાત્રિ મિસ કરીએ છીએ પરંતુ અહીં પણ ઘણાં ગુજરાતીઓ છે અને તેથી વીક એન્ડમાં નવરાત્રિની ઉજવણી કરી તેની કમી પૂરી કરીએ છીએ. આ જગ્યાએ માતાજી ની તસ્વીર સાથે માત્ર પરંપરાગત ગરબા જ રમાડવામાં આવે છે. સુરત- ભારતથી આવેલી પેઢી અને અહીની પેઢી મળી બધા સાથે ગરબા રમી નવરાત્રિની ઉજવણી કરીએ છીએ. આ ઉપરાંત ઘણી વખત ભારતથી વડીલો પણ આવે છે તેથી ત્રણ પેઢી એક સાથે ગરબા રમતા જોવા મળે છે. એટલું જ નહીં પરંતુ ગરબા મા આવનારા મોટાભાગે પારંપારિક પહેરવેશ માં જોવા મળે છે.
