Gujarat Police SMC Raid in Sarkhej : ગુજરાત પોલીસની સ્ટેટ મોનિટરિંગ સેલ (SMC) દ્વારા એક નશા વિરોધી ઓપરેશન હાથ ધરવામાં આવ્યું હતું. SMCએ આજે (24 ઓક્ટોબર) સરખેજમાં હરમૈન-33 સ્થિત રહેણાંક જગ્યા પર દરોડો પાડીને મેફેડ્રોનનો મોટો જથ્થો, રોકડ, વાહનો અને અન્ય કિંમતી વસ્તુઓ જપ્ત કરી હતી.
મોટો ગણવાનું મશીન, વજન કાંટા જપ્ત
પોલીસે આ દરોડા દરમિયાન 289.7 ગ્રામ મેફેડ્રોન જપ્ત કર્યું, જેની અંદાજિત કિંમત આશરે રૂપિયા 28.97 લાખ છે. આ ઉપરાંત, રૂપિયા 35000ની કિંમતના ત્રણ મોબાઇલ ફોન, રૂપિયા 1.23 લાખ રોકડ, રૂપિયા 23 લાખની કિંમતના બે વાહનો, રૂ.10,000નું એક નોટ ગણવાનું મશીન અને રૂપિયા 800ના ચાર વજન કાંટા પણ જપ્ત કરવામાં આવ્યા હતા. જપ્ત કરાયેલી તમામ વસ્તુઓની કુલ અંદાજિત કિંમત રૂપિયા 53.66 લાખ થાય છે.
ચારની ધરપકડ
મુખ્ય આરોપી પરવેઝમિયા શેખ અને સહ-આરોપી મોહમ્મદ ઝૈદ કુરેશી, જે બંને હરમેઇન-33 રેસિડેન્સીના રહેવાસી છે, તેમને વધુ તપાસ માટે સરખેજ પોલીસને સોંપવામાં આવ્યા હતા. જપ્ત કરાયેલ ડ્રગ્સના ગ્રાહકો તરીકે ઓળખાયેલા અન્ય બે વ્યક્તિઓ જૂનાગઢના મોહમ્મદ હુસૈનભાઈ આલા અને સરખેજના તેજસ કિર્તીકાન્ત કારેલિયાને પણ કસ્ટડીમાં લેવામાં આવ્યા છે.
ત્રણ વ્યક્તિઓ વોન્ટેડ જાહેર
પોલીસે આ કેસના સંબંધમાં અન્ય ત્રણ વ્યક્તિઓને વોન્ટેડ જાહેર કર્યા છે, જેમાં કથિત સપ્લાયર્સ આઝમખાન અને અરબાઝખાન, તથા અમદાવાદના વેજલપુરના ગ્રાહક નોમાન શેખનો સમાવેશ થાય છે. મુખ્ય આરોપી પરવેઝમિયા શેખનો અગાઉ પણ NDPS એક્ટ હેઠળ ગુનાહિત રેકોર્ડ હોવાનું જાણવા મળ્યું છે. આ નેટવર્કમાં સામેલ સપ્લાયર્સ અને અન્ય સાથીદારોને શોધવા માટે વધુ તપાસ ચાલી રહી છે.
