Jamnagar : વૈશ્વિક સ્તરે અમેરિકા અને ઈરાન વચ્ચે ચાલી રહેલી યુદ્ધની ભયાવહ દહેશતની સીધી અને નકારાત્મક અસર જામનગરના વિખ્યાત બ્રાસ ઉદ્યોગ પર પડી રહી છે, જેના પરિણામે સમગ્ર ઉદ્યોગમાં મંદીનો કાળો ડિબાંગ માહોલ છવાયો છે. જીઆઇડીસી પ્લોટ એન્ડ શેડ હોલ્ડર્સ એસોસિએશનના પ્રમુખે આ ગંભીર પરિસ્થિતિનો ચિતાર આપતા જણાવ્યું છે કે, જ્યારથી આંતરરાષ્ટ્રીય સ્તરે યુદ્ધનું સંકટ ઊભું થયું છે ત્યારથી જ જામનગરનો આશરે 65 ટકા જેટલો બ્રાસ ઉદ્યોગ સંપૂર્ણ બંધ હાલતમાં ધકેલાઈ ગયો છે. ઉદ્યોગકારો પાસે કામના ઓર્ડરમાં નોંધપાત્ર ઘટાડો નોંધાયો છે, જેના કારણે હાલની પ્રતિકૂળ અસરો છતાં પરિસ્થિતિ વધુ વણસી રહી હોય તેવું પ્રાથમિક દૃષ્ટિએ ભલે ન લાગે, પરંતુ વાસ્તવિકતા અત્યંત ચિંતાજનક છે.
ખાસ કરીને કુશળ કારીગરોની તીવ્ર અછત અને બ્રાસ પાર્ટના ફોર્જિંગ કારખાનાઓમાં વપરાતા ગેસ તેમજ કોમર્શિયલ સિલિન્ડરોના પુરવઠાની અછતને પગલે સરકાર દ્વારા ઝીંકવામાં આવેલા તોતિંગ ભાવવધારાએ બળતામાં ઘી હોમવાનું કામ કર્યું છે. પરિણામે, બ્રાસ પાર્ટના મેન્યુફેક્ચરિંગ ખર્ચમાં અસહ્ય વધારો થયો છે, જેણે નાના અને મધ્યમ કદના ઉદ્યોગકારોની કમર તોડી નાખી છે. ઉત્પાદન ખર્ચના આ આસમાની ઉછાળાની સાથે સાથે હવે પરિવહન અને લોજિસ્ટિક્સ ક્ષેત્રે પણ ગંભીર પડકારો ઊભા થયા છે, જે બ્રાસ ઉદ્યોગના ભવિષ્ય પર પ્રશ્નાર્થ ચિન્હ લગાવી રહ્યા છે.
તાજેતરમાં દેશભરમાં સર્જાયેલી પેટ્રોલ અને ડીઝલની અછતને ધ્યાનમાં રાખીને સરકાર દ્વારા પેટ્રોલ પંપ ધારકોને અપાતો પુરવઠો કડક નિયંત્રણ હેઠળ મૂકવામાં આવ્યો છે. એટલું જ નહીં, પરંતુ સરકારે પેટ્રોલ અને ડીઝલના ભાવમાં પ્રતિ લિટર 3 રૂપિયા જેટલો માતબર વધારો લાગુ કરતા ઉદ્યોગકારોની મુશ્કેલીઓમાં ઓર વધારો થયો છે. ઈંધણના આ કમરતોડ ભાવવધારા અને નિયંત્રિત પુરવઠાના કારણે આગામી દિવસોમાં બ્રાસ ઉદ્યોગ માટે જરૂરી રો-મટીરીયલ (કાચા માલ)ની આયાત અને તૈયાર થયેલા ફિનિશ્ડ માલના પરિવહન સપ્લાય ચેઈન પર અત્યંત ગંભીર અને સીધી અસર જોવા મળશે તેવી પ્રબળ સંભાવના છે. એક તરફ ઉત્પાદન ખર્ચમાં વધારો અને બીજી તરફ ટ્રાન્સપોર્ટેશન મોંઘુ થવાથી જામનગરનો આ વૈશ્વિક ખ્યાતિ પ્રાપ્ત ઉદ્યોગ હાલમાં અસ્તિત્વ ટકાવી રાખવા માટે ચોમેરથી આર્થિક સંકટનો સામનો કરી રહ્યો છે.
