Jamnagar Police : જામનગર શહેરમાં આગામી તા.26ના રોજ યોજાનારી સ્થાનિક સ્વરાજ્યની ચૂંટણીને ધ્યાનમાં રાખી શહેરનું પોલીસ તંત્ર એલર્ટ મોડમાં આવી ગયું છે. ખાસ કરીને સીટી એ. ડિવિઝનના નવનિયુક્ત પી.આઇ. હાજર થયા ત્યારથી સતત એક્શન મોડમાં રહ્યા છે, અને ખાસ કરીને શહેરના સંવેદનશીલ વિસ્તારમાં વિશેષ કોમ્બિંગ હાથ ધરવામાં આવી રહ્યું છે. શહેર તથા જિલ્લામાં કાયદો અને વ્યવસ્થા જળવાઈ રહે તે માટે વિવિધ વિસ્તારોમાં સઘન ચેકિંગ હાથ ધરવામાં આવી રહ્યું છે.
આ અનુસંધાને જામનગર શહેરના સંવેદનશીલ ગણાતા પટણીવાડ વિસ્તારમાં સિટી-એ ડિવિઝન પોલીસ દ્વારા વિશેષ કોમ્બિંગ ઓપરેશન હાથ ધરવામાં આવ્યું હતું. જેમાં પીઆઈ અને પીએસઆઈ સહિતના પોલીસ સ્ટાફ દ્વારા જાહેર સ્થળો, રસ્તાઓ તથા શંકાસ્પદ સ્થળોએ તપાસ કરવામાં આવી હતી. ખાસ કરીને પટણીવાડ વિસ્તારમાં મોડી રાત સુધી ચા-પાનના ગલ્લાઓ પાસે વાહનો સાઈડમાં પાર્ક કરી જમાવડો કરીને બેસનારાઓ સામે પોલીસ દ્વારા કડક કાર્યવાહી કરવામાં આવી હતી. પોલીસની હાજરી જોતા જ કેટલાક લોકો સ્થળ પરથી તાત્કાલિક ભાગી ગયા હતા. પોલીસ દ્વારા સ્પષ્ટ સંદેશ આપવામાં આવ્યો છે કે ચૂંટણી દરમ્યાન કાયદો અને વ્યવસ્થા ભંગ કરવાનો કોઈ પણ પ્રયાસ સહન કરવામાં નહીં આવે, અને આવનારા દિવસોમાં પણ આ પ્રકારની કામગીરી યથાવત રાખવામાં આવશે.
