હલકી ગુણવત્તાના સ્પીડબ્રેકર થોડા સમયમાં તૂટી જાય છે : મુક્ત બજારમાં 950 રૂપિયામાં મીટર ફિટિંગ ચાર્જ સાથે મળતા સ્પીડબ્રેકરના મનપા 2200-2300થી વધુ ચૂકવે છે
જૂનાગઢ, : જૂનાગઢ મહાનગરપાલિકા દ્વારા વોર્ડ વિસ્તારમાં લગાવવામાં આવતા પ્લાસ્ટીકના સ્પીડબ્રેકરમાં પણ કૌભાંડ હોવાના આક્ષેપો ઉઠયા છે. મુક્ત બજારમાં 950 રૂપિયામાં પ્રતિ મીટર મળતા સ્પીડબ્રેકરના મનપા 2200થી 2300 રૂપિયા ચૂકવે છે. વધુ પૈસા ખર્ચી હલ્કી ગુણવત્તાના સ્પીડબ્રેકર લગાવવામાં આવે છે તે થોડા જ સમયમાં તુટી જાય છે. આ સ્પીડબ્રેકર લગાવવામાં પણ મોટાપાયે ભ્રષ્ટાચાર થતો હોવા અંગે તપાસ કરવાની માંગ સાથે કમિશનરને રજુઆત કરવામાં આવી છે.
જૂનાગઢ મનપા વિસ્તારમાં રસ્તા, ગટર, અન્ય પ્રોજેક્ટ સહિતના કામમાં ભ્રષ્ટાચાર થતો હોવાની અનેકવાર આક્ષેપો ઉઠે છે. વિવિધ વિસ્તારમાં રોડ પર પ્લાસ્ટીકના સ્પીડબ્રેકર લગાવવામાં આવે છે તેમાં પણ ભ્રષ્ટાચાર થતો હોવાના આક્ષેપો થઈ રહ્યા છે. વોર્ડ નં.4અને 6 વિસ્તારમાં નવા રોડ પર પ્રજાના પૈસામાંથી પ્લાસ્ટીકના સ્પીડબ્રેકર લગાવવામાં આવ્યા છે તેને થોડો જ સમય થયો છે ત્યાં તુટી ગયા છે.
આ અંગે જોષીપરા વિસ્તારમાં રહેતા ગઢીયાએ જણાવ્યું હતું કે, બરોડાની કંપનીનો ફિટીંગ ચાર્જ સાથે આવા એક મીટર સ્પીડબ્રેકરનો ભાવ 950 રૂપીયા છે. જ્યારે મનપા દ્વારા આ સ્પીડબ્રેકર 2200-2300 રૂપીયાના ભાવે ખરીદ કરવામાં આવે છે. તેની ગુણવત્તા પણ હલ્કી હોવાથી થોડા જ સમયમાં તુટી જાય છે.
નગરસેવકો દ્વારા સ્પીડબ્રેકર માટે ગ્રાન્ટ ફાળવવામાં આવે છે ત્યારબાદ અધિકારીઓ આડેધડ સ્પીડબ્રેકર નાખી દીધાના બિલ બનાવી નાખે છે. હક્કિતમાં એકના એક સ્પીડબ્રેકરના વધુ બિલ મુકવામાં આવતા હોવાની આશંકા છે. આ અંગે કમિશનરને સ્પીડબ્રેકરની ખરીદીમાં મોટાપાયે ભ્રષ્ટાચાર થઈ રહ્યો હોવાની ફરિયાદ કરવામાં આવી છે. આ અંગેની તપાસ કરી જવાબદાર અધિકારીઓ સામે પગલા લેવામાં આવે અને આવી રીતે મુકવામાં આવેલા બિલનું તપાસ વગર ચુકવણું કરવામાં ન આવે એવી માંગ કરવામાં આવી છે.
