India GDP: ચાલુ નાણાકીય વર્ષના પહેલા ત્રિમાસિક ગાળામાં ભારતીય અર્થતંત્રે શાનદાર પ્રદર્શન કર્યું છે. નાણાકીય વર્ષ 2025-26ના પહેલા ત્રિમાસિક ગાળા(એપ્રિલ-જૂન)માં ગ્રોસ ડોમેસ્ટિક પ્રોડક્ટ (GDP) વૃદ્ધિ દર 7.8 ટકા રહ્યો છે. જોકે, અંદાજ 6.7 ટકા હતો. ગયા વર્ષે આ જ ત્રિમાસિક ગાળામાં જીડીપી વૃદ્ધિ દર 6.5 ટકા હતો. જ્યારે ત્રિમાસિક ગાળાના આધારે અર્થતંત્રમાં તેજી નોંધાઈ છે. નાણાકીય વર્ષ 2025ના ચોથા ત્રિમાસિક ગાળામાં જીડીપી વૃદ્ધિ દર 7.4 ટકા હતો.
સેવા ક્ષેત્રે શાનદાર વૃદ્ધિ
અહેવાલો અનુસાર, ભારતીય અર્થતંત્ર વર્ષ 2025-26ની શરુઆતમાં સારી ગતિએ આગળ વધી રહ્યું છે. ખાસ કરીને સેવા ક્ષેત્રમાં તેજી, રોકાણમાં સતત અને સરકારી ખર્ચમાં ઉછાળો, હકારાત્મક સંકેતો છે.
નાણાકીય વર્ષ 2025-26ના પહેલા ત્રિમાસિક ગાળામાં જીડીપીમાં 7.8 ટકાનો વૃદ્ધિ દર નાણાકીય વર્ષ 2024-25ના પહેલા ત્રિમાસિક ગાળામાં 6.5 ટકાના વૃદ્ધિ દર કરતાં ઘણો વધારે છે. આ ઉપરાંત સેવા ક્ષેત્રે શાનદાર વૃદ્ધિને કારણે, ભારતીય અર્થતંત્રે નાણાકીય વર્ષ 2025-26ના પહેલા ત્રિમાસિક ગાળામાં 7.6 ટકાનો વાસ્તવિક ગ્રોસ વેલ્યુ એડેડ (GVA) વૃદ્ધિ દર પણ નોંધાવ્યો છે.
નોમિનલ જીડીપીમાં પણ સારી વૃદ્ધિ
નાણાકીય વર્ષ 2025-26ના પહેલા ત્રિમાસિક ગાળામાં નોમિનલ જીડીપીમાં પણ 8.8 ટકાનો વધારો નોંધાયો. કૃષિ અને સંબંધિત ક્ષેત્રોમાં વાસ્તવિક જીવીએ વૃદ્ધિ દર 3.7 ટકા હતો, જે ગયા વર્ષે નાણાકીય વર્ષના પહેલા ત્રિમાસિક ગાળામાં 1.5 ટકા હતો. જ્યારે ઉત્પાદન ક્ષેત્રે 7.7 ટકા અને બાંધકામ ક્ષેત્રે 7.6 ટકાના આ ત્રિમાસિક ગાળામાં સ્થિર ભાવે 7.5 ટકાથી વધુનો વૃદ્ધિ દર નોંધાવ્યો છે.
આ ક્ષેત્રમાં મંદી જોવા મળી હતી
ખનન અને ખનિજ ઉત્પાદનો ક્ષેત્રમાં -3.1 ટકા અને વીજળી, ગેસ, પાણી પુરવઠા અને અન્ય ઉપયોગિતા સેવાઓ ક્ષેત્રમાં 0.5 ટકાનો વધારો થયો હતો. નાણાકીય વર્ષ 2025-26ના પહેલા ત્રિમાસિક ગાળા દરમિયાન ખાનગી અંતિમ વપરાશ ખર્ચ (PFCE)એ 7.0 ટકાનો વૃદ્ધિ દર નોંધાવ્યો હતો, જે પાછલા નાણાકીય વર્ષના સમાન સમયગાળામાં 8.3 ટકા વૃદ્ધિ દર હતો.
ઉલ્લેખનીય કે,આ આંકડા એવા સમયે આવ્યા છે જ્યારે અમેરિકાના પ્રમુખ ડોનાલ્ડ ટ્રમ્પે ભારત પર 50 ટકા સુધીના ટેરિફ લગાવ્યો છે. જેના કારણે એવો અંદાજ લગાવવામાં આવી રહ્યો હતો કે ભારતનો GDP વૃદ્ધિ દર ઘટશે.
